અમદાવાદ મ્યુનિસિપલ કોર્પોરેશન દ્વારા સ્માર્ટ સિટીના બણગાં ફૂંકવામાં આવી રહ્યા છે, પરંતુ ગ્રાઉન્ડ રિયાલિટી કંઈક અલગ જ ચિત્ર બતાવી રહી છે. શહેરમાં ચોમાસાની ધમાકેદાર એન્ટ્રી થાય તે પહેલા જ માત્ર સામાન્ય વરસાદી ઝાપટાં પડતાં જ ધરણીધરથી નેહરુનગર તરફ જતા વસંતભાઈ ગજેન્દ્રગડકર ઓવરબ્રિજની આખી સરફેસ ધોવાઈ ગઈ છે. બ્રિજ પર એટલા મોટા ગાબડા પડ્યા છે કે વાહનચાલકોને દૂરથી ખાડાનો અંદાજ પણ આવતો નથી, જેના લીધે અનેક વાહનો અચાનક બ્રેક મારતા પાછળના વાહનો અથડાઈ રહ્યા છે.
બ્રિજ વાહનચાલકો માટે કમરતોડ અને જોખમી
વર્ષ 2006માં જ્યારે આ બ્રિજનું લોકાર્પણ કરવામાં આવ્યું હતું, ત્યારે પશ્ચિમ અમદાવાદના લોકોને ટ્રાફિકમાંથી મોટી રાહત મળી હતી. પરંતુ યોગ્ય મેઇન્ટેનન્સના અભાવે અને ભ્રષ્ટ કામગીરીના કારણે આજે આ બ્રિજ વાહનચાલકો માટે કમરતોડ અને જોખમી સાબિત થઈ રહ્યો છે.