અમદાવાદમાં યોજાનારા દિલજીતના કોન્સર્ટને લઈને ક્રિકેટ મેદાનની સુરક્ષા અને જાળવણી માટે આયોજકો દ્વારા ખાસ તૈયારીઓ કરવામાં આવી રહી છે. મોટા કાર્યક્રમો અને કોન્સર્ટ દરમિયાન મેદાન પર પડતા ભારને ધ્યાનમાં રાખીને ક્રિકેટ ગ્રાઉન્ડ, પીચ અને 30 યાર્ડ સર્કલની સુરક્ષા માટે વિશેષ વ્યવસ્થા ગોઠવવામાં આવી છે, જેથી ક્રિકેટના મેદાનની પવિત્રતા અને ગુણવત્તા જળવાઈ રહે. સ્ટેડિયમની મધ્યમાં આવેલી પિચ અને આસપાસના હરિયાળા મેદાનને સુરક્ષિત રાખવા આયોજકો ખાસ તકેદારી લઈ રહ્યા છે.
ખાતર-પાણીનો છંટકાવ અને જર્મન ટેક્નોલોજીથી કવર
પ્રાપ્ત વિગતો અનુસાર, ગ્રાઉન્ડને નુકસાન ન પહોંચે તે માટે સૌપ્રથમ મેદાનમાં ખાતર અને પાણીનો પૂરતો છંટકાવ કરવામાં આવશે. ત્યારબાદ આખા ગ્રાઉન્ડને જર્મન ટેક્નોલોજી થી કવર કરવામાં આવશે, જેથી ભારે ભીડ, સ્ટેજ કે સાધનોના વજન અને હિલચાલથી ઘાસ તથા મેદાનની સપાટીને કોઈ નુકસાન ન થાય.
