અમદાવાદ શહેરના પશ્ચિમ વિસ્તારમાં આવેલા બોપલ સર્કલ પાસે મોડી રાત્રે આગની એક ઘટના સામે આવી છે. અહીંના જાણીતા ટીઆરપી (TRP) મોલ પાસે આવેલી એક દુકાનમાં અચાનક કોઈ કારણોસર આગ ભભૂકી ઉઠી હતી. જોતજોતામાં આગે વિકરાળ સ્વરૂપ ધારણ કરી લેતાં આસપાસના વિસ્તારમાં અને માર્ગ પરથી પસાર થતા લોકોમાં ભારે નાસભાગ અને અફરાતફરીનો માહોલ સર્જાયો હતો.
ફાયર બ્રિગેડની ટીમે આગ પર મેળવ્યો કાબૂ
ઘટનાની જાણ સ્થાનિક રહીશો દ્વારા તાત્કાલિક ફાયર કંટ્રોલ રૂમને કરવામાં આવી હતી. બોપલ અને નજીકના સ્ટેશનથી ફાયર ફાઇટરનો કાફલો ઘટનાસ્થળે દોડી આવ્યો હતો. ફાયર બ્રિગેડના જવાનોએ પાણીનો મારો ચલાવીને ભારે જહેમત બાદ આગ પર સંપૂર્ણ કાબૂ મેળવ્યો હતો અને તેને વધુ આસપાસની દુકાનોમાં ફેલાતી અટકાવી હતી. પ્રાથમિક દ્રષ્ટિએ શોર્ટ સર્કિટના કારણે આગ લાગી હોવાની આશંકા સેવાઈ રહી છે.
