ગુજરાત ટેકનોલોજિકલ યુનિવર્સિટી (GTU) ફરી એકવાર વિવાદોના વંટોળમાં સપડાઈ છે. યુનિવર્સિટીના પ્રોફેસર ડો. મનીષ ઠક્કર સામે પીએચડી (PhD) રિસર્ચ સ્કોલર્સની થિસિસ મંજૂર કરવામાં નિયમોના સરેઆમ ધજાગરા ઉડાડ્યા હોવાના ગંભીર આક્ષેપો સાથે યુનિવર્સિટી ગ્રાન્ટ્સ કમિશન (UGC) ના વિજિલન્સ વિભાગમાં સત્તાવાર ફરિયાદ નોંધાવવામાં આવી છે. ફરિયાદમાં દાવો કરવામાં આવ્યો છે કે જે જર્નલ કાયદેસર રીતે બંધ થઈ ચૂકી હતી તેમાં રિસર્ચ પેપર પ્રકાશિત કરાવીને તેમજ પ્રકાશનની સાલ અને તારીખોમાં ગેરકાયદે છેડછાડ કરીને થિસિસને નિયમવિરુદ્ધ મંજૂરી અપાવવામાં આવી છે. આ મામલો સીધો દિલ્હી યુજીસી દરબારમાં પહોંચતાં જીટીયુના શૈક્ષણિક વર્તુળોમાં ભારે ખળભળાટ મચી ગયો છે.
બંધ જર્નલ અને તારીખોની છેડછાડ
યુજીસીના કડક નિયમો અનુસાર પીએચડી સ્કોલરે પોતાની થિસિસ સબમિટ કરતાં પહેલાં માન્ય અને એક્ટિવ જર્નલમાં રિસર્ચ પેપર પ્રકાશિત કરવું અનિવાર્ય હોય છે. જોકે આ કિસ્સામાં પહેલેથી જ બંધ થઈ ગયેલી જર્નલમાં પેપર પ્રકાશિત કરવામાં આવ્યું હોવાનું સામે આવ્યું છે.પેપરના મૂળ પ્રકાશન વર્ષ ૨૦૨૨ સામે વેબસાઇટ પર વર્ષ 2024 ની વિગતો દર્શાવવામાં આવી હોવાનો ચોંકાવનારો દાવો કરાયો છે.ગાઈડલાઈન્સની મર્યાદામાં ગોઠવવા માટે રિસર્ચ પેપરના પ્રકાશનની વાસ્તવિક તારીખોમાં જાણીજોઈને મોટો ફેરફાર અને છેડછાડ કરવામાં આવી હોવાની પ્રબળ આશંકા વ્યક્ત કરવામાં આવી છે.