રાજ્યની સૌથી જૂની અને પ્રતિષ્ઠિત ગણાતી ગુજરાત યુનિવર્સિટી સહિત સમગ્ર ગુજરાતના સરકારી યુનિવર્સિટી તંત્રના ઇતિહાસમાં ક્યારેય ન બની હોય તેવી અભૂતપૂર્વ અને સનસનાટીભરી ઘટના સામે આવી છે. ગુજરાત યુનિવર્સિટીના પૂર્વ કુલપતિ (વાઇસ ચાન્સલર) ડૉ. નીરજા ગુપ્તા સામે કાયદાકીય તપાસના મુદ્દે વિધિવત રીતે સત્તાવાર જાહેર ફરિયાદ નોંધવામાં આવી છે. યુનિવર્સિટીના વર્તમાન ઇન્ચાર્જ કુલપતિ ડૉ. જગદીશ જોશીના સીધા આદેશ બાદ આ આકરી કાર્યવાહી કરવામાં આવી છે, જેને પગલે સમગ્ર રાજ્યના ઉચ્ચ શિક્ષણ જગતમાં ભારે ખળભળાટ વ્યાપી ગયો છે.

કોઈપણ વ્યક્તિ કે સંસ્થા કરી શકશે જાહેર ફરિયાદ

અગાઉના સમયમાં યુનિવર્સિટીઓના કુલપતિઓ સામે ગંભીર આક્ષેપો કે ફરિયાદો ઉઠતી હોવા છતાં તેને દબાવી દેવામાં આવતી હતી અથવા માત્ર કાગળ પર સીમિત રાખવામાં આવતી હતી. જોકે, આ વખતે સમગ્ર પ્રક્રિયા પારદર્શક અને કાયદાકીય માળખા હેઠળ લાવવામાં આવી છે.ઇન્ચાર્જ કુલપતિના નિર્દેશાનુસાર પૂર્વ કુલપતિ ડૉ. નીરજા ગુપ્તાના કાર્યકાળ દરમિયાન થયેલી વહીવટી, શૈક્ષણિક કે નાણાકીય અનિયમિતતાઓ સામે હવે કોઈપણ સામાન્ય નાગરિક, અધ્યાપક, વિદ્યાર્થી કે સંસ્થા સત્તાવાર રીતે જાહેર ફરિયાદ નોંધાવી શકશે.આ વ્યવસ્થાના કારણે ભૂતકાળમાં થયેલા નિર્ણયો અને વિવાદો અંગે વ્યાપક પુરાવાઓ એકત્રિત કરવાનો માર્ગ મોકળો બન્યો છે.

હાઈકોર્ટના પૂર્વ જજને સોંપાઈ નિષ્પક્ષ તપાસની કમાન

આ મામલો અત્યંત સંવેદનશીલ અને ઉચ્ચ સ્તરનો હોવાથી કોઈ પૂર્વગ્રહ વિના ન્યાયિક રીતે દૂધનું દૂધ અને પાણીનું પાણી થાય તે હેતુથી તપાસની જવાબદારી ન્યાયતંત્રના વરિષ્ઠ હાથોમાં સોંપવામાં આવી છે.ઇન્ચાર્જ કુલપતિ ડૉ. જગદીશ જોશીએ આ સમગ્ર કાનૂની તપાસ ગુજરાત હાઈકોર્ટના પૂર્વ ન્યાયાધીશ (રિટાયર્ડ હાઈકોર્ટ જજ) ને સોંપી દીધી છે.નિવૃત્ત હાઈકોર્ટ જજની અધ્યક્ષતામાં રચાનારી આ વિશેષ તપાસ સમિતિ તમામ ફરિયાદો, દસ્તાવેજો અને નિર્ણય પ્રક્રિયાની તલસ્પર્શી ચકાસણી કરશે.

શૈક્ષણિક આલમમાં ઉગ્ર ચર્ચા અને આશ્ચર્ય

રાજ્યની સરકારી યુનિવર્સિટીઓમાં અત્યાર સુધી નિવૃત્ત કે પૂર્વ કુલપતિઓ સામે માત્ર રાજકીય કે આંતરિક સ્તરે જ આક્ષેપબાજી થતી જોવા મળતી હતી.આ પ્રથમ એવો કિસ્સો છે જેમાં ચાલુ ઇન્ચાર્જ કુલપતિ દ્વારા પોતાના જ પુરોગામી પૂર્વ કુલપતિ સામે સત્તાવાર ફોજદારી/વહીવટી કાયદાકીય તપાસના આદેશ આપવામાં આવ્યા હોય.આ કડક પગલાથી અન્ય યુનિવર્સિટીઓમાં પણ ભ્રષ્ટાચાર કે અનિયમિતતા આચરનારા અધિકારીઓ અને પદાધિકારીઓમાં ફફડાટ વ્યાપી ગયો છે. આગામી દિવસોમાં આ ન્યાયિક તપાસમાં કેવા મોટા ઘટસ્ફોટ થાય છે તેના પર સૌની નજર ટકેલી છે.

આ પણ વાંચો: Surat: પેરોલ પર છૂટી નાસતા ફરતા પાકા કામના કેદીને ભેસ્તાન ચાર રસ્તા પાસે ઘેરી લીધો