શહેરના ખોખરા વિસ્તારમાં કાંકરિયા રોડ પર આવેલ કે.કે. શાસ્ત્રી કોલેજ નજીક ન્યુ ગ્રીન માર્કેટ પાસે મોડી રાત્રે એક ગમખ્વાર હિટ એન્ડ રનની ઘટના બની છે, જેમાં એક સિક્યુરિટી ગાર્ડનું ઘટનાસ્થળે જ કરુણ મોત નિપજ્યું છે.
ખોખરામાં હિટ એન્ડ રન
મળતી માહિતી મુજબ, મૃતક રમણભાઈ પરમાર ન્યુ ગ્રીન માર્કેટમાં સિક્યુરિટી ગાર્ડ તરીકે નોકરી કરતા હતા. તેઓ રાત્રે આશરે 3 વાગ્યાના સુમારે ચા પીવા માટે રોડ ક્રોસ કરી રહ્યા હતા. આ દરમિયાન, એક અજાણ્યા અને પૂરપાટ ઝડપે આવતા વાહનના ચાલકે તેમને જોરદાર ટક્કર મારી હતી. ટક્કર વાગતા તેઓ રોડ પર પટકાયા હતા અને અજાણ્યા વાહનનું વ્હીલ તેમના માથા ઉપરથી ફરી વળ્યું હતું, જેના કારણે તેમનું ઘટનાસ્થળે જ કમકમાટીભર્યું મૃત્યુ થયું હતું.
