વ્યક્તિગત ઓળખ અને મૂળભૂત અધિકારોને લગતા એક મહત્ત્વના કાનૂની કિસ્સામાં 34 વર્ષીય યુવકે પોતાના જન્મ અને શાળા છોડ્યાના પ્રમાણપત્રમાં નામ તથા જેન્ડર સુધારવા માટે ગુજરાત હાઈકોર્ટમાં અરજી કરી છે.જસ્ટિસ નિર્ઝર એસ.દેસાઈએ પ્રાથમિક સુનાવણી બાદ ગુજરાત સરકાર, રાજકોટ મહાનગરપાલિકાના જન્મ-મરણ નોંધણી રજિસ્ટ્રાર, જિલ્લા શિક્ષણાધિકારી અને તેની શાળાને નોટિસ ફટકારી છે.આ મામલે તમામ સંબંધિત પક્ષકારો પાસેથી ખુલાસો માંગવામાં આવ્યો છે અને કેસની વધુ સુનાવણી 9 ઑક્ટોબર, 2026ના રોજ રાખી છે.
આ અરજદારનો જન્મ 1992માં થયો હતો
રિટ અરજીની વિગતો અનુસાર,આ અરજદારનો જન્મ 1992માં થયો હતો અને શરૂઆતના સરકારી દસ્તાવેજોમાં તે મહિલા તરીકે નોંધાયેલી હતી.જોકે સમય જતાં તેમણે જાતિગત અસંતોષ અનુભવ્યો હતો અને તબીબી તપાસ બાદ તેમાં જેન્ડર આઈડેન્ટિટી ડિસઓર્ડર હોવાનું નિદાન સામે આવ્યું હતું.નિષ્ણાત તબીબોની સલાહ બાદ સર્જરી સફળતાપૂર્વક કરાવી હતી.ત્યારબાદ વર્ષ 2018માં તેમને નવા પુરુષ ઓળખકાર્ડ સાથેનું સત્તાવાર જેન્ડર રેકગ્નિશન સર્ટિફિકેટ પણ ઇશ્યૂ કરવામાં આવ્યું હતું જે તેમની નવી પુરુષ તરીકેની ઓળખને કાનૂની માન્યતા આપતું હતું.