ભારત સરકારના કેન્દ્રીય મંત્રી અને પોરબંદરના સાંસદ ડૉ. મનસુખભાઈ માંડવિયાએ સમસ્ત ગુજરાત અને દેશ-વિદેશમાં વસતા તમામ શ્રદ્ધાળુ ભાઈ-બહેનોને સૌરાષ્ટ્રની પાવન ધરા પર પ્રગટેલા અનંત ઊર્જાના સ્ત્રોત, ભક્તિ અને સેવાના પર્યાય સમાન સંત શિરોમણી પૂજ્ય જલારામ બાપાની 227મી જન્મ જયંતીના પાવન અવસરે હૃદયપૂર્વકની અને ભક્તિભાવ સભર શુભેચ્છાઓ પાઠવી છે. મંત્રીએ જણાવ્યું હતું કે, વીરપુર મુકામે જન્મેલા પૂજ્ય જલારામ બાપાનું નામ સેવા, સમર્પણ અને 'અન્નદાન એ જ મહાદાન'ના પરમ આદર્શ તરીકે ઇતિહાસના પાનાઓ પર સુવર્ણ અક્ષરે અંકિત થયેલું છે.
સેવાની દિવ્ય જ્યોત અને માનવતાનો સંદેશ
મંત્રીએ પોતાના સંવેદનશીલ ભાવો વ્યક્ત કરતા ઉમેર્યું હતું કે, દેને કો ટુકડા ભલો, લેને કો હરિ નામના મંત્રને પોતાના જીવનનો શ્વાસ બનાવીને ભૂખ્યાને ભોજન અને નિરાધારને આધાર આપવાની દિવ્ય જ્યોત પૂજ્ય બાપાએ પ્રગટાવી હતી. તેમણે નાત-જાત કે અમીર-ગરીબના ભેદભાવ વિના માત્ર 'દરિદ્ર નારાયણ'ની સેવામાં જ ઈશ્વરનો સાક્ષાત્કાર કર્યો હતો. તેમની આ સેવાકીય સુવાસ આજે સમગ્ર વિશ્વમાં જ્યાં જ્યાં ગુજરાતીઓ વસે છે ત્યાં પ્રસર પામી છે.