અમદાવાદના નરોડા વિસ્તારમાં ઘરકંકાસ અને સામાન્ય પારિવારિક બોલાચાલીએ અત્યંત લોહિયાળ અને ખૌફનાક સ્વરૂપ ધારણ કર્યું છે. નરોડા સ્માર્ટ સીટી-૨ માં રહેતા એક દંપતી વચ્ચે જમવા બાબતે શરૂ થયેલી સામાન્ય બોલાચાલી એટલી હદે વકરી ગઈ હતી કે ૩૪ વર્ષીય પત્નીએ આવેશમાં આવીને રસોડામાંથી ધારદાર ચપ્પુ લાવી પતિના છાતીના ભાગે ઘા ઝીંકી દીધો હતો. ગંભીર રીતે લોહીલુહાણ થઈ ગયેલા પતિનું ઘટનાસ્થળે જ કમકમાટીભર્યું મોત નીપજ્યું હતું. હત્યાની આ સનસનાટીભરી ઘટનાની જાણ થતાં જ નરોડા પોલીસના ઉચ્ચ અધિકારીઓ ઘટનાસ્થળે દોડી આવ્યા હતા અને ટેકનિકલ સર્વેલન્સ તેમજ સીસીટીવી ફૂટેજના આધારે ગણતરીના કલાકોમાં હત્યારી પત્નીને ઝડપી પાડી જેલના સળિયા પાછળ ધકેલી દીધી છે.
જમવા બાબતે શરૂ થઈ તકરાર, રસોડામાંથી ચપ્પુ લાવી જીવલેણ ઘા કર્યો
નરોડા સ્માર્ટ સીટી-૨ માં રહેતા દિલીપભાઈ ખરાડી અને તેમની 34 વર્ષીય પત્ની નિર્મલાબેન વચ્ચે છેલ્લા કેટલાક સમયથી નાની-મોટી બાબતોમાં ઘરકંકાસ ચાલતો હતો. દરમિયાન જમવા બાબતે બંને વચ્ચે ઉગ્ર બોલાચાલી શરૂ થઈ હતી. તકરાર દરમિયાન આવેશમાં આવી ગયેલી નિર્મલાબેને રસોડામાંથી શાકભાજી સમારવાનું તીક્ષ્ણ ચપ્પુ ઉઠાવી લીધું હતું અને કોઈપણ વિચાર કર્યા વગર પતિ દિલીપભાઈની છાતીના ડાબા ભાગે જોરદાર ઘા ઝીંકી દીધો હતો.ચપ્પુનો ઘા સીધો હૃદયની નજીક લાગતાં દિલીપભાઈ લોહીના ખાબોચિયામાં ઢળી પડ્યા હતા અને ગણતરીની મિનિટોમાં જ તેમનું પ્રાણપંખેરું ઊડી ગયું હતું. બનાવની જાણ થતાં જ નરોડા પોલીસ સ્ટેશનનો કાફલો ઘટનાસ્થળે પહોંચી ગયો હતો. મૃતદેહનો પંચનામો કરી પોસ્ટમોર્ટમ અર્થે સરકારી હોસ્પિટલ ખસેડવામાં આવ્યો હતો.