Ahmedabad: નારોલમાં બિસ્માર રસ્તાથી પ્રજા પરેશાન, AMCની બેદરકારી યથાવત

શહેરના નારોલ વિસ્તારમાં આવેલી 'મટન ગલી' માં રસ્તાઓની બિસ્માર હાલતથી સ્થાનિક પ્રજા ભારે હાલાકીનો સામનો કરી રહી છે. સૌથી ગંભીર બાબત એ છે કે, આ જ વિસ્તારમાં બે માસ અગાઉ ખાડામાં પડી જવાથી એક દંપતીનું કરુણ મોત થયું હોવા છતાં, અમદાવાદ મ્યુનિસિપલ કોર્પોરેશન (AMC)ની બેદરકારી હજુ પણ યથાવત છે.

બે મોત છતાં તંત્ર નિષ્ક્રિય

નારોલ મટન ગલીમાં રોડ-રસ્તા તૂટેલા અને ઠેર-ઠેર મોટા ખાડાઓ જોવા મળે છે. બે મહિના પહેલાં ખાડાઓમાં પાણી ભરાયેલા હોવાને કારણે એક દંપતી ખાડામાં પડતાં મૃત્યુ પામ્યું હતું. આ અઘટિત અને કરુણ ઘટનાને બે માસ જેટલો સમય વીતી ગયો હોવા છતાં, AMC દ્વારા રસ્તાઓની મરામત કરવામાં આવી નથી, જેના કારણે સ્થાનિકોમાં ભારે રોષ જોવા મળી રહ્યો છે.

 સ્ટ્રીટ લાઇટનો પણ અભાવ

બિસ્માર રસ્તાઓની સાથે-સાથે આ વિસ્તારમાં સ્ટ્રીટ લાઇટનો પણ અભાવ છે. અનેક જગ્યાએ સ્ટ્રીટ લાઇટ બંધ હોવાથી રાત્રિના સમયે અંધારપટ છવાઈ જાય છે. તૂટેલા રસ્તા અને અંધારાના કારણે રાત્રિના સમયે અકસ્માત થવાનો ભય સતત રહે છે. બે-બે મોત જેવી ગંભીર ઘટના બાદ પણ AMC દ્વારા તાત્કાલિક કોઈ કાર્યવાહી કરવામાં ન આવતા, પ્રજાને આ બિસ્માર રસ્તાઓ પર જીવનું જોખમ લઈને અવરજવર કરવી પડી રહી છે.