Ahmedabad: સાણંદમાં કડક કાર્યવાહી, હત્યાના આરોપીના ગેરકાયદે દબાણ પર બુલડોઝર ફર્યું

અમદાવાદ જિલ્લાના સાણંદ તાલુકામાં કાયદાનું કડક પાલન કરાવવા માટે પોલીસ અને GIDC દ્વારા સંયુક્ત કાર્યવાહી કરવામાં આવી છે. સાણંદ GIDC પોલીસ સ્ટેશન વિસ્તારના ચરલ ગામમાં હત્યાના ગુનામાં સંડોવાયેલા અને અસામાજિક પ્રવૃત્તિઓ સાથે સંકળાયેલા આરોપી મહેશના ગેરકાયદે દબાણને તોડી પાડવામાં આવ્યું છે.

 ગેરકાયદે દબાણને તોડી પાડવામાં આવ્યું

પ્રાપ્ત માહિતી અનુસાર આરોપી મહેશે ચરલ ગામના ત્રણ રસ્તા પાસે આવેલી GIDCની જગ્યા પર ગેરકાયદેસર દબાણ કરીને પાન પાર્લરનો શેડ બનાવી દીધો હતો. આ આરોપી અગાઉ ખૂનના ગંભીર ગુનામાં સંડોવાયેલો હતો અને તેની અસામાજિક પ્રવૃત્તિઓને કારણે વિસ્તારમાં ભયનો માહોલ હતો.

GIDCની જગ્યા પર ગેરકાયદેસર દબાણ

પોલીસ અને વહીવટી તંત્રએ આવા અસામાજિક તત્વો સામે કડક વલણ અપનાવ્યું છે. તારીખ 19/11/2025ના રોજ GIDC ઓફિસના સ્ટાફ અને સાણંદ GIDC પોલીસની હાજરીમાં આ ગેરકાયદેસર દબાણ હટાવવાની કાર્યવાહી હાથ ધરવામાં આવી હતી.પોલીસના ચુસ્ત બંદોબસ્ત વચ્ચે દબાણ પર બુલડોઝર ફેરવીને ગેરકાયદેસર પાન પાર્લરનો શેડ તોડી પાડવામાં આવ્યો હતો. ભૂમાફિયા અને અસામાજિક તત્વો સામેની આ કડક કાર્યવાહીથી અન્ય દબાણકર્તાઓમાં ફફડાટ વ્યાપી ગયો છે.