દક્ષિણ ગુજરાતના મુસાફરો,દૈનિક અપ-ડાઉન કરતો વર્ગ તેમજ વેપારીઓ માટે આગામી ગાંધી જયંતી ડબલ ખુશખબર લઈને આવી રહી છે.સુરતથી રાજસ્થાનના પ્રવાસન ધામ ઉદયપુર સિટી વચ્ચે નવી સેમી હાઈસ્પીડ વંદે ભારત એક્સપ્રેસ અને વલસાડ-સુરત વચ્ચે નવી દૈનિક મેમુ ટ્રેન શરૂ કરવાની દિશામાં રેલવે બોર્ડ મંજૂરીની મહોર લગાવી દીધી છે.જોકે,રેલવે તંત્ર તરફથી હજુ આ અંગેની સત્તાવાર જાહેરાત કરવામાં આવી નથી,પરંતુ આગામી બીજી ઓક્ટોબરે ગાંધી જયંતીના પાવન અવસરે સુરતથી આ બંને ટ્રેનોને લીલીઝંડી દર્શાવી પ્રસ્થાન કરાવવા માટે રેલવે પ્રશાસને યુદ્ધના ધોરણે તૈયારીઓ શરૂ કરી દીધી છે.ત્યારબાદ ત્રીજી ઓક્ટોબરથી આ બંને ટ્રેન સંભવત રૂટિન દોડાવાશે.
વડોદરા અને અસારવા ખાતે વોટરિંગની સુવિધા
સુરત અને રાજસ્થાન વચ્ચે વેપાર અને પર્યટન ક્ષેત્રે મહત્વની સાબિત થનારી સુરત-ઉદયપુર વંદે ભારત એક્સપ્રેસ (ટ્રેન નં.20903/20904) 8 કોચના રેક સાથે દોડાવાશે.આ ટ્રેન સપ્તાહમાં 6 દિવસ ચાલશે અને મંગળવારે તેનું સંચાલન બંધ રહેશે.ટ્રેન નંબર 20903 સુરતથી સવારે 6.10 વાગ્યે રવાના થશે.જે બપોરે 3.35 કલાકે ઉદયપુર પહોંચશે.પરત ફરતી વખતે ટ્રેન નંબર 20904 ઉદયપુર સિટીથી રાત્રે 11.00 વાગ્યે નીકળી બીજા દિવસે સુરત આવી પહોંચશે.આ ટ્રેન બંને દિશામાં ભરૂચ, વડોદરા, આણંદ, મહિસાગર, અસારવા, હિંમતનગર, શામળાજી રોડ, ડુંગરપુર અને જાવરે સ્ટેશને કમર્શિયલ સ્ટોપેજ મળશે.આ ઉપરાંત પ્રાથમિક મેન્ટેનન્સ ઉદયપુર ખાતે થશે, જ્યારે વડોદરા અને અસારવા ખાતે વોટરિંગની સુવિધા કરાશે.