Ahmedabad: નારાયણ ગુરુ કોલેજ બહાર વિદ્યાર્થીઓ વચ્ચે થઈ હતી મારામારી, પોલીસે મામલો પાડયો થાળે

અમદાવાદ શૈક્ષણિક સંસ્થાઓની બહાર વિદ્યાર્થીઓ વચ્ચે ઘર્ષણના બનાવો યથાવત રહેતા, અમદાવાદમાં વધુ એક બનાવ સામે આવ્યો છે. શહેરની નારાયણ ગુરુ કોલેજની બહાર વિદ્યાર્થીઓના બે જૂથ વચ્ચે મુખ્ય માર્ગ પર જ જાહેરમાં મારામારી થઈ હતી, જેનો એક વીડિયો પણ વાયરલ થયો છે.

ઈસ્કોનથી શિવરંજની રોડ પર બબાલ

આ ઘટના શહેરના મુખ્ય માર્ગો પૈકીના એક એવા ઈસ્કોનથી શિવરંજની તરફ જતાં રસ્તા પર બની હતી. નારાયણ ગુરુ કોલેજની બહાર જ વિદ્યાર્થીઓના બે ગ્રુપ સામસામે આવી ગયા હતા અને એકબીજાને માર મારવા લાગ્યા હતા. મુખ્ય માર્ગ પર જાહેરમાં થઈ રહેલી આ મારામારીના કારણે થોડા સમય માટે વાતાવરણ તંગ બની ગયું હતું. આ દરમિયાન અન્ય સાથી વિદ્યાર્થીઓએ વચ્ચે પડીને મામલો શાંત પાડ્યો હતો. પ્રાથમિક માહિતી મુજબ, આ મારામારી કોઈ અંગત અદાવતના કારણે થઈ હોવાની આશંકા છે.

વિદ્યાર્થીઓમાં વધતી હિંસા અંગે ચિંતા

શહેરની કોલેજો અને શાળાઓમાં અભ્યાસ કરતા વિદ્યાર્થીઓ હવે નાના-મોટા ઝઘડાઓમાં હિંસાનો માર્ગ અપનાવી રહ્યા હોય તેવું લાગી રહ્યું છે. થોડા સમય પૂર્વે જ સેવન્થ ડે સ્કૂલની બહાર વિદ્યાર્થીઓ વચ્ચે થયેલા ઝઘડામાં એક વિદ્યાર્થીનું મૃત્યુ થયું હતું, જેના પગલે સમગ્ર શહેરમાં ચિંતા ફેલાઈ હતી.  શૈક્ષણિક સંસ્થાઓની બહાર જાહેરમાં મારામારીના આ બનાવોને કારણે, વિદ્યાર્થીઓના વર્તન અને સુરક્ષાના મુદ્દે ગંભીર સવાલો ઊભા થયા છે. આ ઘટના અંગે પોલીસે તપાસ હાથ ધરી છે.