ડાંગ જિલ્લાના આહવા-વઘઈ રોડ પર વહેલી સવારે એક અત્યંત અરેરાટીભર્યો અને ગમખ્વાર અકસ્માત સર્જાયો છે. પૂરઝડપે આવી રહેલી એક કાર અચાનક ચાલકના કાબૂ બહાર જતાં માર્ગની રેલિંગ તોડીને સીધી નીચે વહેતી ખાપરી નદીમાં ખાબકી હતી. આ ભયાનક દુર્ઘટનામાં કારમાં સવાર ત્રણ લોકો પૈકી બે વ્યક્તિઓના સ્થળ પર જ કરૂણ મોત નીપજ્યા છે, જ્યારે અન્ય એક વ્યક્તિ ગંભીર રીતે ઈજાગ્રસ્ત થઈ છે.
વહેલી સવારે 4 વાગ્યે સર્જાયો અકસ્માત
મળતી વિગતો અનુસાર, આ દુર્ઘટના વહેલી સવારે આશરે 4 વાગ્યાના સુમારે આહવા-વઘઈ રોડ પર સ્થિત ખાપરી નદીના પુલ નજીક બની હતી. અકસ્માતમાં કારમાં સવાર સંદીપભાઈ ડામોર અને શૈલેષભાઈ ગરાસીયા નામના બે વ્યક્તિઓને ગંભીર ઈજાઓ પહોંચતાં તેમનું કમકમાટીભર્યું મોત નીપજ્યું હતું. બનાવની જાણ થતાં જ સ્થાનિક લોકો અને પોલીસ કાફલો તુરંત ઘટનાસ્થળે દોડી આવ્યો હતો.