બનાસકાંઠા જિલ્લાના સુપ્રસિદ્ધ યાત્રાધામ અંબાજી ખાતે આગામી ભાદરવી પૂનમના મહામેળાને ધ્યાનમાં રાખીને અંબાજી અને આસપાસના વિસ્તારોમાં ખાદ્ય ખોરાકની ગુણવત્તા જળવાઈ રહે તે માટે ફૂડ એન્ડ ડ્રગ્સ વિભાગ સંપૂર્ણપણે એક્શન મોડમાં આવી ગયું છે. મેળા દરમિયાન દેશ-વિદેશમાંથી લાખોની સંખ્યામાં આવતા પદયાત્રીઓ અને માઈભક્તોને શુદ્ધ, આરોગ્યપ્રદ અને સલામત ભોજન મળી રહે તે સુનિશ્ચિત કરવા તંત્ર દ્વારા વિશેષ ઝુંબેશ શરૂ કરવામાં આવી છે.
72 ખાદ્ય પેઢીઓની તપાસ અને 83 સેમ્પલનું ટેસ્ટિંગ
અંબાજી મંદિરે દર્શનાર્થે આવતા યાત્રાળુઓ અને સ્થાનિક લોકોના આરોગ્ય સાથે કોઈ ચેડાં ન થાય તે હેતુથી ફૂડ સેફ્ટી વાન સાથે અધિકારીઓની ટીમે વિવિધ વિસ્તારોમાં સઘન તપાસ હાથ ધરી હતી. આ ઓપરેશન દરમિયાન હોટેલો, રેસ્ટોરન્ટ્સ, ફરસાણ અને મિઠાઈની દુકાનો સહિત કુલ 72 ખાદ્ય પેઢીઓનું કડક ચેકિંગ કરવામાં આવ્યું હતું. ટીમે સ્થળ પર જ કેમિકલ અને ભૌતિક ગુણવત્તા ચકાસવા માટે 83 ખાદ્ય પદાર્થોના સેમ્પલ લઈને મોબાઇલ લેબોરેટરીમાં ટેસ્ટિંગ કર્યું હતું.
અખાદ્ય સામગ્રી અને બળેલા તેલનો સ્થળ પર જ નાશ કરાયો
તપાસ દરમિયાન આરોગ્ય માટે નુકસાનકારક પદાર્થોનો ઉપયોગ કરતા વેપારીઓ સામે કડક વલણ અપનાવવામાં આવ્યું હતું. ફૂડ વિભાગની ટીમે દરોડા દરમિયાન સ્થળ પરથી મળી આવેલું 7 લીટર જેટલું બળેલું તેલ, 3 કિલો અખાદ્ય પેપર અને મિઠાઈ તેમજ ખોરાકમાં વપરાતી સિન્થેટિક કલરની 2 ડબ્બીઓ જપ્ત કરીને સ્થળ પર જ તેનો નાશ કરાવ્યો હતો.
યાત્રાળુઓની સ્વાસ્થ્ય સુરક્ષા માટે તંત્ર સજ્જ
ભાદરવી પૂનમના મહામેળામાં લાખો ભક્તો પ્રસાદી અને ભોજનનો લાભ લેતા હોય છે. આથી, વાસી કે ગુણવત્તા વગરના ખોરાકના કારણે કોઈ યાત્રાળુ બીમાર ન પડે અને ખાદ્ય સામગ્રીમાં મિલાવટ અટકે તે માટે તંત્ર આયોજનબદ્ધ કામગીરી કરી રહ્યું છે. ફૂડ વિભાગે તમામ વેપારીઓને સ્વચ્છતા જાળવવા અને નિયમોનું પાલન કરવાની કડક સૂચનાઓ પણ આપી છે.
આગામી દિવસોમાં પણ કડક ચેકિંગ ચાલુ રહેશે
અંબાજી ધામ ખાતે યોજાનારા આ મહાકુંભ જેવા મેળા દરમિયાન ફૂડ વિભાગની ખાસ ટીમો સતત પેટ્રોલિંગમાં રહેશે. અધિકારીઓના જણાવ્યા મુજબ, મેળાના દિવસો દરમિયાન પણ ખાદ્ય પદાર્થોનું ઓચિંતું ચેકિંગ ચાલુ રાખવામાં આવશે. જો કોઈ વેપારી અખાદ્ય, ભેળસેળયુક્ત કે દૂષિત ખોરાકનું વેચાણ કરતો ઝડપાશે તો તેની સામે ફૂડ સેફ્ટી એક્ટ મુજબ કાયદેસરની કડક કાર્યવાહી કરવામાં આવશે.
આ પણ વાંચો: Ambaji News : ભક્તોને મળશે શુદ્ધ અને સાત્વિક ભોજન! ફૂડ સેફ્ટી વાન દોડતી થઈ, 83 સેમ્પલનું ઓન-ધ-સ્પોટ ચેકિંગ
