ભાવનગર અને રાજકોટ હાઈવે પરથી અકસ્માતના એક અત્યંત દુઃખદ અને હૃદયદ્રાવક સમાચાર સામે આવ્યા છે. ભાવનગર-રાજકોટ હાઈવે પર સિહોર નજીક આવેલ દાદાની વાવ વિસ્તારમાં એક ગમખ્વાર અકસ્માત સર્જાયો હતો. પૂરઝડપે દોડતી ભાવનગર-રાજકોટ રૂટની એસ.ટી. બસ અને એક ટુ-વ્હીલર વચ્ચે થયેલી આ ભયાનક ટક્કરમાં ટુ-વ્હીલર પર સવાર એક યુવાનનું ઘટનાસ્થળ પર જ કમકમાટીભર્યું મૃત્યુ નીપજ્યું હતું. આ અકસ્માત એટલો જોરદાર હતો કે વાહનના ફૂરચા ઉડી ગયા હતા.
ઘટનાસ્થળે લોકોના ટોળા ઉમટ્યા
આ દુર્ઘટનામાં જીવ ગુમાવનાર યુવાનની ઓળખ 18 વર્ષીય યુવરાજજી વીરાજી ચૌહાણ તરીકે થઈ છે. યુવાન વયે જ દીકરાનું અચાનક અકસ્માતમાં અવસાન થવાના સમાચાર મળતા જ તેના પરિવાર પર આભ ફાટી પડ્યું હતું અને પરિવારજનોમાં ભારે શોક વ્યાપી ગયો હતો. અકસ્માતના આ બનાવની જાણ થતાં જ આસપાસના વિસ્તારમાંથી મોટી સંખ્યામાં લોકો અને સ્થાનિક પોલીસ કાફલો ત્વરિત ઘટનાસ્થળે દોડી આવ્યા હતા. પોલીસ દ્વારા મૃતદેહને પોસ્ટમોર્ટમ અર્થે ખસેડવાની તજવીજ હાથ ધરવામાં આવી હતી.