ભાવનગર જિલ્લાના સિહોરમાં એક અત્યંત કરુણ અને દુઃખદ ઘટના સામે આવી છે, જ્યાં બે દિવસથી ગુમ થયેલી એક યુવતીનો મૃતદેહ ગૌતમેશ્વર તળાવમાંથી મળી આવ્યો છે. યુવતીએ ગૌતમેશ્વર તળાવમાં ઝંપલાવીને જીવન ટૂંકાવ્યું હોવાનું પ્રાથમિક તપાસમાં માલુમ પડ્યું છે. આ યુવતી છેલ્લા બે દિવસથી ગુમ હતી, જેના કારણે તેના પરિવારજનો અને સ્થાનિક લોકો દ્વારા તેની શોધખોળ ચાલી રહી હતી. બે દિવસની શોધખોળ બાદ આખરે તળાવમાં યુવતીનો મૃતદેહ તરતો જોવા મળતાં સ્થાનિકોએ તાત્કાલિક ફાયર વિભાગ અને પોલીસને જાણ કરી હતી. આ સમાચારથી સિહોર પંથકમાં શોકનો માહોલ છવાઈ ગયો છે.
ફાયર વિભાગ દ્વારા મૃતદેહ બહાર કઢાયો
યુવતીનો મૃતદેહ મળ્યાની જાણ થતાં જ ફાયર વિભાગની ટીમ તાત્કાલિક ગૌતમેશ્વર તળાવ ખાતે દોડી આવી હતી. ફાયર વિભાગના જવાનોએ ભારે જહેમત બાદ યુવતીના મૃતદેહને તળાવમાંથી બહાર કાઢ્યો હતો. ત્યારબાદ મૃતદેહને પોસ્ટમોર્ટમ અને અન્ય કાયદેસરની કાર્યવાહી માટે સ્થાનિક સરકારી હોસ્પિટલમાં ખસેડવામાં આવ્યો હતો. ઘટનાની જાણ થતાં યુવતીના પરિવારજનો પણ તળાવ ખાતે દોડી આવ્યા હતા અને તેમની આક્રંદથી વાતાવરણ ગમગીન બની ગયું હતું. યુવતીએ કયા કારણોસર આટલું ગંભીર અને અંતિમ પગલું ભર્યું, તે અંગે હજુ સુધી કોઈ ચોક્કસ માહિતી મળી શકી નથી.
