ભાવનગર જિલ્લાના પાલીતાણા તાલુકાના જામવાળી ગામે વિદ્યાર્થીઓ વચ્ચેની જૂની અદાવતમાં ગંભીર ઘટના બની છે. અહીં ધોરણ 10ના એક વિદ્યાર્થી પર ધોરણ 11ના વિદ્યાર્થીએ તેના બે સાથીઓ સાથે મળીને છરી વડે હુમલો કર્યો હતો.
સ્કૂલેથી પરત ફરતી વખતે કર્યો હુમલો
આ ઘટના જામવાળી ગામની ઉન્નતી વિદ્યાલયના વિદ્યાર્થીઓ વચ્ચે બની હતી. જાણવા મળ્યા મુજબ, ધોરણ 10માં અભ્યાસ કરતો વિદ્યાર્થી સ્કૂલેથી પોતાના ઘરે પરત ફરી રહ્યો હતો. તે દરમિયાન ધોરણ 11માં અભ્યાસ કરતા મુખ્ય આરોપી વિદ્યાર્થી અને તેના અન્ય બે સાથીદારોએ મળીને તેને આંતર્યો અને તેની સાથે મારામારી કરી. આ હુમલાનું કારણ લગભગ 15 દિવસ પહેલાં બંને જૂથના વિદ્યાર્થીઓ વચ્ચે થયેલી જૂની બોલાચાલી હતી. જૂની અદાવતનું વેર વાળવા માટે ત્રણ સગીરોએ એકસાથે મળીને આ હુમલો કર્યો હતો.
