નર્મદા યોજનાને લઈને ગુજરાત સહિત 4 રાજ્યો વચ્ચે લાંબા સમયથી ચાલી રહેલા નાણાકીય વિવાદના ઉકેલ તરફ મોટું પગલું ભરાયું છે. નર્મદા નિયંત્રણ સત્તામંડળે સરદાર સરોવર યોજના સહિતની યોજનાઓનાં બાકી લેણાંની ચૂકવણીની પદ્ધતિને મંજૂરી આપી છે. આ ચૂકવણી નાણાકીય વર્ષ 2026-27 દરમિયાન કરવાની યોજના છે.
નર્મદા યોજનાનાં બાકી લેણાં ચૂકવવા મંજૂરી
નર્મદા યોજનાને લઈને ગુજરાત સહિત 4 રાજ્યો વચ્ચે લાંબા સમયથી ચાલતા ખર્ચની વહેંચણીના મુદ્દે મોટો નિર્ણય લેવામાં આવ્યો છે. નર્મદા નિયંત્રણ સત્તામંડળની સમીક્ષા સમિતિની 15મી બેઠકમાં સરદાર સરોવર યોજના સાથે જોડાયેલાં બાકી લેણાંની ચૂકવણીની પદ્ધતિને મંજૂરી આપવામાં આવી છે. આ રકમની ચૂકવણી નાણાકીય વર્ષ 2026-27 દરમિયાન કરવાની યોજના છે.
4 રાજ્યો વચ્ચેના વિવાદના ઉકેલ તરફ મોટું પગલું
27 ઓક્ટોબર 2026ના રોજ વીડિયો કોન્ફરન્સ દ્વારા યોજાયેલી આ બેઠક કેન્દ્રીય જળશક્તિ મંત્રી અને સમિતિના અધ્યક્ષ સી.આર. પાટીલની અધ્યક્ષતામાં યોજાઈ હતી. તેમાં ગુજરાતના મુખ્યમંત્રી ભૂપેન્દ્ર પટેલ, મહારાષ્ટ્રના મુખ્યમંત્રી દેવેન્દ્ર ફડણવીસ, મધ્ય પ્રદેશના મુખ્યમંત્રી મોહન યાદવ અને રાજસ્થાનના મુખ્યમંત્રી ભજનલાલ શર્મા જોડાયા હતા. બેઠકમાં ભારતના એટર્ની જનરલના અભિપ્રાય અને 7 જુલાઈ 2026ના રોજ નવી દિલ્હીમાં ચાર રાજ્યો વચ્ચે થયેલા સમજૂતી કરારને સ્વીકારવામાં આવ્યો હતો. આ કરારનો હેતુ રાજ્યો વચ્ચેના બાકી નાણાકીય દાવાઓ, લેણાં અને જવાબદારીઓનો એક વખતમાં ઉકેલ લાવવાનો છે.
સરદાર સરોવર યોજનાના ખર્ચનો વિવાદ ઉકેલાશે
સરદાર સરોવર યોજનાના બાંધકામના ખર્ચની વહેંચણીને લઈને ગુજરાત, મધ્ય પ્રદેશ, મહારાષ્ટ્ર અને રાજસ્થાન વચ્ચે લાંબા સમયથી પ્રશ્નો હતા. હવે સમજૂતી કરારને મંજૂરી મળતાં આ બાકી નાણાકીય મુદ્દાઓનો એક વખતમાં ઉકેલ લાવવાનો માર્ગ ખુલ્યો છે. સમિતિએ નર્મદા જળ વિવાદ ટ્રિબ્યુનલના ચુકાદા હેઠળ આવતી યોજનાઓનાં બાકી લેણાંની ચૂકવણી માટેની પદ્ધતિને પણ મંજૂરી આપી છે. આ ચૂકવણી નાણાકીય વર્ષ 2026-27માં પૂર્ણ કરવાની યોજના છે.
સી.આર. પાટીલે 4 રાજ્યોના મુખ્યમંત્રીઓનો આભાર માન્યો
કેન્દ્રીય જળશક્તિ મંત્રી સી.આર. પાટીલે સમજૂતી કરારને સ્વીકારવા અને બાકી લેણાંની ચૂકવણીની પદ્ધતિને અંતિમ સ્વરૂપ આપવા બદલ ચારેય રાજ્યોના મુખ્યમંત્રીઓનો આભાર માન્યો હતો. તેમણે જણાવ્યું કે વડાપ્રધાન નરેન્દ્ર મોદીના માર્ગદર્શન હેઠળ આંતરરાજ્ય નદીજળ સંબંધિત પ્રશ્નો ઉકેલવા સતત પ્રયાસો કરવામાં આવી રહ્યા છે. આ પ્રક્રિયામાં ચારેય રાજ્યોના અધિકારીઓ, જળસંસાધન વિભાગ અને નર્મદા નિયંત્રણ સત્તામંડળના અધિકારીઓએ કરેલા કામની પણ તેમણે પ્રશંસા કરી હતી.
નર્મદા મુદ્દે સહમતીથી વિકાસને વેગ મળવાની આશા
ચારેય રાજ્યો વચ્ચે થયેલી આ સમજૂતીને સરદાર સરોવર યોજનાના ખર્ચની વહેંચણીના લાંબા સમયથી ચાલતા પ્રશ્નો ઉકેલવા માટે મહત્ત્વપૂર્ણ પગલું માનવામાં આવે છે. બાકી નાણાંની ચૂકવણી માટેની પદ્ધતિ નક્કી થતાં રાજ્યો વચ્ચેના નાણાકીય પ્રશ્નોના ઉકેલની પ્રક્રિયાને આગળ વધારવામાં મદદ મળશે.
વધુ સમાચાર વાંચવા ડાઉનલોડ કરો સંદેશ ન્યૂઝ એપ : https://sandesh.com/d
