Gandhinagarના કુડાસણ વિસ્તારમાં 9 સપ્ટેમ્બર 2026ની રાત્રે ‘બોસ્કી ધ એમ્પાયર’ નામની નિર્માણાધીન કોમર્શિયલ સાઇટ પર ઈમારતનો સ્લેબ/માળખાનો મોટો હિસ્સો અચાનક ધરાશાયી થયો હતો. પ્રાથમિક અહેવાલો મુજબ, ક્રેન અથવા લોખંડના સ્ટ્રક્ચર સાથેની કામગીરી દરમિયાન આ દુર્ઘટના બની હોવાની માહિતી સામે આવી છે. આ ઘટનામાં 10થી 15 જેટલા શ્રમિકો કાટમાળ નીચે ફસાયા હોવાની શરૂઆતમાં આશંકા વ્યક્ત કરવામાં આવી હતી. ફાયર બ્રિગેડ, પોલીસ અને રેસ્ક્યૂ ટીમોએ તાત્કાલિક બચાવ કામગીરી શરૂ કરી હતી. અનેક શ્રમિકોને કાટમાળમાંથી બહાર કાઢીને ગાંધીનગર સિવિલ હોસ્પિટલમાં સારવાર માટે ખસેડવામાં આવ્યા હતા. ઘટનાના ચોક્કસ કારણની તપાસ હજુ મહત્વપૂર્ણ છે.
https://twitter.com/ANI/status/2097747729149829398
બે કલાકથી વધુ સમયથી રેસ્ક્યૂ ઓપરેશન
ઈમારતનો મોટો ભાગ ધરાશાયી થતાં ઘટનાસ્થળે કાટમાળનો વિશાળ ઢગલો થઈ ગયો હતો. આ કાટમાળમાં શ્રમિકો ફસાયા હોવાની આશંકા વચ્ચે SDRF, ફાયર બ્રિગેડ અને પોલીસની ટીમોએ તાત્કાલિક રેસ્ક્યૂ ઓપરેશન શરૂ કર્યું હતું. કાટમાળ હટાવવા માટે ક્રેન સહિતના સાધનોની મદદ લેવામાં આવી રહી છે. આ ઘટના બાદ બે કલાકથી વધુ સમયથી રેસ્ક્યૂ ટીમો સતત કામગીરી કરી રહી છે. કાટમાળનો એક-એક ભાગ હટાવીને કોઈ વ્યક્તિ અંદર ફસાઈ છે કે નહીં તેની તપાસ કરવામાં આવી રહી છે
જો કોઈ નહોતું તો રેસ્ક્યૂ શા માટે?
નાયબ મુખ્યમંત્રી હર્ષ સંઘવી ઘટનાસ્થળે પહોંચ્યા હતા. તેમણે જણાવ્યું હતું કે અત્યાર સુધીમાં 15 લોકોને બચાવી લેવામાં આવ્યા છે. જોકે, તેમણે એ પણ કહ્યું કે સાઇટ મેનેજરે શરૂઆતમાં ઘટનાસ્થળે કોઈ હાજર ન હોવાનું જણાવ્યું હતું. સાઇટ મેનેજરના જણાવ્યા પ્રમાણે ઘટનાસ્થળે કોઈ શ્રમિક હાજર જ નહોતો, તો પછી કાટમાળમાં માનવજીવનની આશંકાને ધ્યાનમાં રાખીને રેસ્ક્યૂ ઓપરેશન શા માટે કરવામાં આવી રહ્યું છે? અને જો શ્રમિકો હાજર હતા, તો તેમની હાજરી અને સુરક્ષાની જવાબદારી કોની હતી?
https://twitter.com/ANI/status/2097753719521911192
DGPથી લઈને ફાયર અને SDRF સુધીની ટીમો મેદાનમાં
ઘટનાની ગંભીરતાને જોતા SDRF, ફાયર બ્રિગેડ અને પોલીસની ટીમો સતત બચાવ કામગીરીમાં લાગી છે. DGP પણ ઘટનાસ્થળે પહોંચ્યા છે. કાટમાળ ઝડપથી હટાવવા માટે ક્રેન અને અન્ય સાધનોની મદદ લેવામાં આવી રહી છે. ઘાયલ શ્રમિકોને ગાંધીનગર સિવિલ હોસ્પિટલમાં સારવાર માટે ખસેડવામાં આવ્યા છે. આરોગ્ય વિભાગને પણ એલર્ટ કરવામાં આવ્યો છે અને ડૉક્ટરોને જરૂરી વ્યવસ્થા સાથે હાજર રહેવાની સૂચના આપવામાં આવી છે. ઇમરજન્સી સ્થિતિ માટે તબીબી ટીમોને તૈયાર રાખવામાં આવી છે.
નિયમોની તપાસ થાય છે, સુરક્ષાની કેટલી?
હવે સૌથી મોટો સવાલ માત્ર એ નથી કે કેટલા લોકોને બચાવવામાં આવ્યા. સવાલ એ છે કે આ ઘટના માત્ર એક દુર્ઘટના હતી કે પછી તેની પાછળ કોઈ ગંભીર બેદરકારી હતી? નિર્માણાધીન સાઇટ પર સલામતીના નિયમોનું પાલન થયું હતું કે નહીં, તેની તપાસ પણ એટલી જ મહત્વની બની છે. નિર્માણકાર્ય શરૂ થાય તે પહેલાં અનેક મંજૂરીઓ અને નિયમોની તપાસ કરવામાં આવે છે. પરંતુ શું સ્થળ પર કામ કરતા શ્રમિકોની વાસ્તવિક સુરક્ષાની પણ એટલી જ ગંભીરતાથી તપાસ થાય છે? કુડાસણની ઘટના આ સવાલ ફરી એકવાર સિસ્ટમ સામે મૂકી રહી છે.
રેસ્ક્યૂ બાદ હવે જવાબદારીનો વારો
આ ઘટના બાદ માત્ર બચાવ કામગીરી પૂર્ણ કરવી પૂરતી નથી. સાઇટ પર સુરક્ષાના નિયમોનું પાલન થયું હતું કે નહીં, શ્રમિકોની હાજરી અંગે શરૂઆતમાં ખોટી માહિતી કેમ આપવામાં આવી અને દુર્ઘટના પાછળનું ચોક્કસ કારણ શું છે—આ તમામ સવાલોના જવાબ શોધવા જરૂરી છે. જો તપાસમાં કોઈની બેદરકારી સામે આવે તો જવાબદારી નક્કી થવી જોઈએ અને નિયમ મુજબ કડક કાર્યવાહી થવી જોઈએ. કારણ કે શ્રમિકોની સુરક્ષા માત્ર કાગળ પરની જવાબદારી નથી. એક ભૂલ કોઈ પરિવારનો આખો આધાર છીનવી શકે છે.
આ પણ વાંચો: કુડાસણમાં બોસ્કી ધ એમ્પાયર સાઇટમાં સ્લેબ ધરાશાયી, 12 શ્રમિકો ઇજાગ્રસ્ત, Video
