આજે એર ઇન્ડિયાના સંચાલનમાં મોટી ખામી સર્જાતા દેશભરના એરપોર્ટ પર મુસાફરોને ભારે હાલાકીનો સામનો કરવો પડ્યો હતો. પ્રાપ્ત માહિતી અનુસાર, એર ઇન્ડિયાના મુખ્ય સર્વરમાં નેટવર્ક ઇશ્યૂ ને કારણે ખામી સર્જાઇ હતી, જેના પરિણામે 1 કલાકથી વધુ સમય માટે સર્વર ડાઉન થઈ ગયું હતું. આ ટેક્નિકલ ખામીને કારણે એર ઇન્ડિયાની સમગ્ર ઓનલાઈન ચેક-ઇન અને બોર્ડિંગ સિસ્ટમ ઠપ્પ થઈ ગઈ હતી, જેના કારણે સમગ્ર ફ્લાઇટ સંચાલન ખોરવાઈ ગયું હતું.
ફ્લાઇટના શિડ્યુઅલ ખોરવાયા, મુસાફરો પરેશાન
સર્વર ડાઉન થવાની સીધી અસર ફ્લાઇટના શિડ્યુઅલ પર પડી હતી. સમયસર ચેક-ઇન ન થવાને કારણે એર ઇન્ડિયાની અનેક ફ્લાઇટો તેમના નિર્ધારિત સમય કરતાં વિલંબથી ઊડાન ભરી શકી હતી, જેનાથી મુસાફરોની હાલાકી વધી હતી. દેશના મુખ્ય એરપોર્ટ પર મુસાફરો લાંબો સમય સુધી રાહ જોતા જોવા મળ્યા હતા. ફ્લાઇટના વિલંબના કારણે એરપોર્ટ પર પરેશાન મુસાફરોની ફરિયાદોનો ઢગલો થયો હતો અને અરાજકતાનો માહોલ સર્જાયો હતો. મુસાફરી કરવા આવેલા લોકોને ચેક-ઇન માટે લાંબી કતારોમાં ઊભા રહેવું પડ્યું હતું.
