બોડેલી સહિત સમગ્ર છોટાઉદેપુર જિલ્લામાં સમી સાંજે સાડા પાંચ વાગે વાવાઝોડા સાથે વરસાદ પડતા ચોમાસાની જમાવટ જેવો માહોલ સર્જાયો હતો. આકાશમાં કાળા ડિબાંગ વાદળો એ ઘેરાબંધી કરી હતી. વીજળીના ચમકારા અને કડાકા ભડાકા સાથે જોરદાર વરસાદ ખાબકતા બજારોમાં વરસાદથી બચવા અને માલ સામાન ઢાંકવા માટે સર્જાતી હતી. ખેડૂતોને પણ વગર નોટીસે ઓચિંતા પડેલા વરસાદને લીધે વ્યાપક યાતનાઓ ભોગવવી પડી હતી.
પ્રી મોનસુનની કામગીરી માટે કલેકટર ની સૂચનાને લીધે બોડેલીમાં વરસાદી પાણી નિકાલ માટે કોતરમાં પહેલેથી જ વ્યવસ્થા થઈ ગયેલી હોવાથી વરસાદી પાણી કોતરોમાં થઈ નદીમાં ઠલવાયા હતા. જો કે અલીપુરા વિસ્તારમાં ગોપાલ સિનેમા પાસે તોતિંગ હોર્ડીંગ વીજવાયરો ઉપર પડતા કલાકો સુધી વીજપુરવઠો ખોરવાયો હતો. મોડાસર ચોકડી પાસે તોતિંગ વૃક્ષ ધરાશાયી થતા હાઇવે ઉપર ટ્રાફિક જામ સર્જાયો હતો. જબુગામ સહિત સંખેડા પંથકમાં પણ ધોધમાર વરસાદને લઇ વાતાવરણમાં ઠંડક પ્રસરી ગઇ હતી. આખા દિવસના ઉકળાટ બાદ મોડી સાંજે અચાનક મેઘમહેર થતાં લોકોને રાહત થઈ હતી. જ્યારે ખેડૂતોએ વરસાદના વધામણા કર્યા હતા. જે સાથે તાલુકામાં કેળના પાકને નુકસાન થયાના અહેવાલ પ્રાપ્ત થયા છે.
