અમદાવાદ શહેરના જોધપુર વિસ્તારમાં આવેલું AMTS (અમદાવાદ મ્યુનિસિપલ ટ્રાન્સપોર્ટ સર્વિસ) નું બસ સ્ટેન્ડ રાતોરાત ગાયબ થઈ જતાં મોટો વિવાદ ઊભો થયો છે. BSNL કોલોની તરફ આવેલું બસ સ્ટેન્ડ યથાવત છે, પરંતુ તેની સામેના ભાગે આવેલું આખું બસ શેડ રાત્રિના સમયે પાઇપ કાપીને હટાવી દેવામાં આવ્યું હતું. સવારે જ્યારે મુસાફરો બસ પકડવા આવ્યા ત્યારે સ્ટેન્ડ ગાયબ જોઈને આશ્ચર્યચકિત થઈ ગયા હતા. તંત્રની જાણ બહાર કે મંજૂરીથી આ સ્ટેન્ડ હટાવાયું છે તે અંગે સ્પષ્ટતા ન થતાં લોકોમાં ભારે રોષ જોવા મળી રહ્યો છે.
મુસાફરો ભારે પરેશાન, હવે શિવરંજની સુધીના ધક્કા
બસ સ્ટેન્ડ ગાયબ થઈ જવાના કારણે રોજેરોજ AMTS બસમાં મુસાફરી કરતા વૃદ્ધો, મહિલાઓ અને નોકરિયાતો અસહ્ય તાપમાં ઉભા રહેવા મજબૂર બન્યા છે. એટલું જ નહીં, બસ સ્ટેન્ડનું શેડ જ ન હોવાથી બસ ચાલકો પણ બસ ઊભી રાખ્યા વિના આગળ નીકળી જાય છે, જેના કારણે સ્થાનિકોને હવે બસ પકડવા માટે છેક શિવરંજની સુધી ચાલીને કે અન્ય વાહનમાં જવું પડે છે. જાહેર સુવિધાનો આ રીતે અચાનક નાશ કરાતાં મુસાફરોને ભારે હાલાકી અને મુશ્કેલીનો સામનો કરવો પડી રહ્યો છે.