અમદાવાદ શહેરમાં જાહેર રોડ પર પોલીસના જાહેરનામાનો ભંગ કરીને જન્મદિવસની ઉજવણી કરવાનો વધુ એક કિસ્સો સામે આવ્યો છે. શહેરના જુહાપુરા-ફતેવાડી વિસ્તારનો હોવાનું માનવામાં આવતો એક વીડિયો સોશિયલ મીડિયા પર ભારે વાયરલ થઈ રહ્યો છે. આ વીડિયોમાં કેટલાક યુવકો જાહેર રસ્તા પર દાદાગીરી અને રોફ જમાવવા માટે વાહનવ્યવહાર અટકાવીને હંગામો કરતા નજરે પડી રહ્યા છે.
ગાડીના બોનેટ પર કેક કાપી ફટાકડા ફોડી મચાવ્યો ધમાલ
વાયરલ થયેલા વીડિયોમાં જોઈ શકાય છે કે, યુવકોએ જાહેર રોડ પર જ પોતાની ગાડીઓ ઉભી રાખી દીધી હતી. ત્યારબાદ ગાડીના બોનેટ પર કેક મુકીને ધામધૂમથી જન્મદિવસની ઉજવણી કરવામાં આવી હતી. આટલું જ નહીં, વિસ્તારમાં પોતાનો વટ અને રોફ જમાવવા માટે જાહેર રસ્તા પર જ જોરદાર ફટાકડા પણ ફોડવામાં આવ્યા હતા, જેના કારણે ત્યાંથી પસાર થતા અન્ય રાહદારીઓ અને વાહનચાલકો ભારે મુશ્કેલીમાં મુકાયા હતા.