અમદાવાદ ગ્રામ્ય LCB દ્વારા જિલ્લામાં બનતી ઘરફોડ ચોરી અને વાહન ચોરીની ઘટનાઓ પર અંકુશ મેળવવા માટે ચલાવવામાં આવી રહેલી ઝુંબેશમાં મોટી સફળતા મળી છે. LCBની ટીમે બાતમીના આધારે 3 કુખ્યાત આરોપીઓને ઝડપી પાડવામાં સફળતા મેળવી છે. પકડાયેલા આરોપીઓમાં શ્રવણભાઈ રમેશભાઈ હાડા, અશોકભાઈ રમેશભાઈ હાડા અને ખાલિદખાન કફિલઅહમદ ખાનનો સમાવેશ થાય છે. આ પકડ સાથે પોલીસે અસલાલી અને કણભા પોલીસ સ્ટેશન વિસ્તારમાં નોંધાયેલા ઘરફોડ ચોરીના વણઉકેલાયેલા ગુનાઓનો ભેદ સફળતાપૂર્વક ઉકેલી નાખ્યો છે.
આરોપીઓ વિરુદ્ધ અગાઉથી જ ગંભીર ગુનાઓ નોંધાયેલા
પકડાયેલા આરોપીઓનો ગુનાહિત ઇતિહાસ ખૂબ જ લંબો હોવાનું પોલીસ તપાસમાં સામે આવ્યું છે. મુખ્ય આરોપી શ્રવણભાઈ રમેશભાઈ હાડા વિરુદ્ધ અગાઉ વિવિધ પોલીસ સ્ટેશનોમાં ચોરી, લૂંટ અને ઘરફોડ જેવા 15 જેટલા ગુનાઓ નોંધાયેલા છે. જ્યારે બીજા આરોપી અશોકભાઈ રમેશભાઈ હાડા વિરુદ્ધ પણ અગાઉના 11 જેટલા ગુનાઓ નોંધાયેલા હોવાની વિગતો બહાર આવી છે. આ કુખ્યાત શખ્સો લાંબા સમયથી પોલીસની પકડથી બચીને ગુનાઓને અંજામ આપી રહ્યા હતા, પરંતુ LCB ની સઘન તપાસને કારણે આખરે તેઓ કાયદાના ગાળીયામાં આવી ગયા છે.