અમદાવાદ શહેરમાં નવરાત્રિના પવિત્ર તહેવાર દરમિયાન કોઈ અનિચ્છનીય ઘટના ન બને અને નશાખોરીના દૂષણને ડામી શકાય તે માટે અમદાવાદ SOG (સ્પેશિયલ ઓપરેશન્સ ગ્રુપ) ક્રાઈમ બ્રાન્ચ એક્શન મોડમાં આવી ગઈ છે. શહેરના અત્યંત ધમધમતા અને પોશ એવા પકવાન ચાર રસ્તા પર SOG ક્રાઈમ બ્રાન્ચે નાકાબંધી કરીને સઘન ચેકિંગ ઓપરેશન હાથ ધર્યું છે. ખાસ કરીને યુવાધન ડ્રગ્સ જેવા ઝેરી નશાનો ભોગ ન બને અને ગરબા મહોત્સવમાં કોઈ નશાની હાલતમાં ખલેલ ન પહોંચાડે તે માટે આ ખાસ ડ્રાઈવ શરૂ કરવામાં આવી છે.

અદ્યતન ડ્રગ એનાલિટિક કિટનો ઉપયોગ

પોલીસ ટીમ દ્વારા આ ચેકિંગ પ્રક્રિયામાં આધુનિક ટેકનોલોજીનો ઉપયોગ કરવામાં આવી રહ્યો છે. રસ્તે જતા-આવતા તેમજ શંકાસ્પદ જણાતા યુવાનો અને વાહનચાલકોને રોકીને ઘટનાસ્થળે જ તેમના સલાઈવા (લાળ) સેમ્પલ લેવામાં આવી રહ્યા છે. આ સેમ્પલને પોર્ટેબલ ડ્રગ એનાલિટિક કિટમાં મૂકીને સ્થળ પર જ ટેસ્ટ કરવામાં આવે છે, જેનાથી તુરંત જ સ્પષ્ટ થઈ જાય છે કે વ્યક્તિએ કોઈ ચોક્કસ પ્રકારના માદક પદાર્થનું સેવન કર્યું છે કે નહીં.   

પોઝિટિવ રિપોર્ટ પર થશે કડક કાર્યવાહી

SOG ક્રાઈમ બ્રાન્ચના અધિકારીઓના જણાવ્યા મુજબ, જે પણ વ્યક્તિનું સલાઈવા સેમ્પલ ડ્રગ ટેસ્ટિંગ કિટમાં પોઝિટિવ આવશે, તેની સામે નાર્કોટિક્સ એક્ટ હેઠળ ત્વરિત અને કડક કાનૂની કાર્યવાહી હાથ ધરવામાં આવશે. નવરાત્રિ દરમિયાન શહેરના અલગ-અલગ વિસ્તારો અને ગરબા વેન્યુ આસપાસ પણ આવી જ રીતે અચાનક સરપ્રાઈઝ ચેકિંગ ચાલુ રાખવામાં આવશે, જેથી કરીને યુવાનોને નશાની ગરતામાં હોમાતા બચાવી શકાય અને શહેરનું વાતાવરણ સુરક્ષિત રાખી શકાય.

આ પણ વાંચો : Bhavnagar News : પરીક્ષા પછી ગુણ કેવી રીતે બદલાઈ ગયા? જાણો ભાવનગર બેંક ભરતી કૌભાંડમાં રજિસ્ટ્રારની નોટિસમાં શું નીકળ્યું!