અમદાવાદ શહેરમાં મચ્છરોના ઉપદ્રવને ડામવા અને રોગચાળો અટકાવવાના નામે મ્યુનિસિપાલ કોર્પોરેશન (AMC) દ્વારા કરવામાં આવતી ખરીદીઓ ફરી એકવાર વિવાદના ઘેરાવામાં આવી છે. આગામી 1 વર્ષના સમયગાળા માટે તંત્ર દ્વારા અંદાજે 250 મેટ્રિક ટન જેટલો મેલેથિઓન પાવડર ખરીદવાનો નિર્ણય લેવામાં આવ્યો છે. આ ખરીદી પ્રક્રિયા દરમિયાન બજારના અંદાજ કરતાં ઊંચા ભાવ ચૂકવવામાં આવ્યા હોવાના અહેવાલો સામે આવતા વહીવટી તંત્રની પારદર્શિતા સામે ગંભીર સવાલો ઉભા થયા છે.
અંદાજ કરતાં 2.31 ટકા ઊંચા ભાવે ખરીદી પાછળ 97 લાખથી વધુનો જંગી ખર્ચ
મળતી માહિતી મુજબ, AMC દ્વારા આ મેલેથિઓન પાવડરની ખરીદી મંજૂર કરવામાં આવી છે તે અંદાજિત બજાર કિંમત કરતાં આશરે 2.31 ટકા જેટલા ઊંચા ભાવે કરવામાં આવી છે. આ મોંઘી ખરીદીના કારણે તંત્રને માત્ર આ પાવડર પાછળ 97 લાખ રૂપિયાથી પણ વધુ જંગી રકમ ખર્ચવી પડી રહી છે. એક તરફ મનપા દ્વારા શહેરમાં મચ્છરોના ઉપદ્રવને રોકવાના દાવા કરવામાં આવે છે, તો બીજી તરફ ઊંચા ભાવે થતી આ ખરીદીના કારણે પ્રજાના નાણાંના વ્યય બાબતે આક્રોશ જોવા મળી રહ્યો છે.