દિલ્હીના ઇન્દિરા ગાંધી ઇન્ટરનેશનલ (IGI) એરપોર્ટ પર કસ્ટમ્સ વિભાગે મળેલી ચોક્કસ બાતમીના આધારે સોનાની તસ્કરીનો મોટો પ્રયાસ નિષ્ફળ બનાવ્યો છે. રિયાધથી આવેલી SV-760 ફ્લાઇટમાં પ્રવાસ કરી રહેલા એક ભારતીય મુસાફર પર કસ્ટમ્સ અધિકારીઓને શંકા ગઈ હતી. જ્યારે આ મુસાફર ગ્રીન ચેનલ પાર કરીને બહાર જઈ રહ્યો હતો, ત્યારે અધિકારીઓએ તેને અટકાવીને સઘન તપાસ અને પૂછપરછ હાથ ધરી હતી.
X-ray સ્ક્રીનિંગમાં સોનાની પેસ્ટ ધરાવતી 2 કેપ્સ્યુલ ઝડપાઈ
શંકાસ્પદ મુસાફરના સામાનનું X-ray સ્ક્રીનિંગ કરવામાં આવતાં જ અધિકારીઓને બેગની અંદર શંકાસ્પદ ઈમેજ જોવા મળી હતી. જેના આધારે બેગેજ ખોલીને ઊંડાણપૂર્વક તપાસ હાથ ધરતાં અંદરથી સોનાની પેસ્ટથી ભરેલી 2 મોટી કેપ્સ્યુલ મળી આવી હતી. કસ્ટમ્સ વિભાગ દ્વારા જપ્ત કરવામાં આવેલી આ બંને કેપ્સ્યુલ્સનું કુલ વજન 745.8 ગ્રામ હોવાનું સામે આવ્યું હતું, જેને ગેરકાયદેસર રીતે ભારતમાં ઘૂસાડવાનો પ્રયાસ કરવામાં આવી રહ્યો હતો.