ડિરેક્ટોરેટ ઓફ રેવન્યુ ઇન્ટેલિજન્સ (DRI) દ્વારા દેશવ્યાપી ઓપરેશન હાથ ધરી સોનાની દાણચોરી કરતા એક મોટા સંગઠિત સિન્ડિકેટનો ભાંડો ફોડવામાં આવ્યો છે.આ મેગા કાર્યવાહીમાં DRIએ આશરે 15 કિલો સોનું અને 45 કિલો ચાંદી જપ્ત કરી છે.જેની બજાર કિંમત અંદાજે 23 કરોડ રૂપિયા હોવાનું સામે આવ્યું છે.આ ઓપરેશનમાં અત્યાર સુધીમાં કુલ 15 લોકોની ધરપકડ કરવામાં આવી છે.
મુંબઈમાં મોટું નેટવર્ક ઝડપાયું
DRIને મળેલી બાતમીના આધારે મુંબઈ એરપોર્ટ પર કાર્યરત એક સંગઠિત રેકેટનો પર્દાફાશ થયો છે.એજન્સીએ અહીં એક ગુપ્ત મેલ્ટિંગ યુનિટ શોધી કાઢ્યું હતું.જ્યાં દાણચોરીના સોનાને પ્રોસેસ કરવામાં આવતું હતું.આ કેસમાં એરપોર્ટ સ્ટાફ, હેન્ડલર્સ, મધ્યસ્થીઓ અને યુનિટના સંચાલકો સહિત 9 લોકોની ધરપકડ કરવામાં આવી છે અને 6 કિલો વિદેશી સોનું જપ્ત કરાયું છે. બેંગલુરુ એરપોર્ટ પર એક મુસાફરના કપડાંમાં પેસ્ટ સ્વરૂપે છુપાવેલું 1.8 કિલો 24 કેરેટ સોનું ઝડપાયું હતું.ત્યારબાદ આરોપીના ઘરે દરોડા પાડીને વધારાનું 1.5 કિલો સોનાના દાગીના,45 કિલો ચાંદી તેમજ ભારતીય અને વિદેશી ચલણ કબજે કરાયું હતું.
