ગુજરાતમાં ગુનાખોરી પર કાબૂ મેળવવા અને અસામાજિક તત્વોમાં કાયદાનો ડર ઊભો કરવા માટે ગુજરાત પોલીસ દ્વારા શરૂ કરાયેલ 'ઓપરેશન લંગડા' અંતર્ગત મોટો સપાટો બોલાવવામાં આવ્યો છે. ગંભીર ગુના આચરીને પોલીસ કસ્ટડીમાંથી ભાગવાનો કે પોલીસ ટુકડી પર હુમલો કરવાનો પ્રયાસ કરતા આરોપીઓ સામે પોલીસે આકરું વલણ અપનાવ્યું છે. આ ખાસ ઝુંબેશના કારણે રાજ્યભરના ગુનેગારો અને કેફી પદાર્થોના કારોબારીઓમાં ભારે ફફડાટ વ્યાપી ગયો છે.
છેલ્લા 2 વર્ષમાં 21 આરોપીઓ પર ફાયરિંગ
પોલીસ વિભાગ દ્વારા જાહેર કરવામાં આવેલા સત્તાવાર આંકડાઓ અનુસાર, છેલ્લા 2 વર્ષના ટૂંકા ગાળામાં પોલીસે અલગ-અલગ ઘટનાઓમાં એકશન લેતા કુલ 21 આરોપીઓ પર ફાયરિંગ કર્યું છે. કસ્ટડીમાંથી ભાગવા જતાં હાથ ધરાયેલા સેલ્ફ-ડિફેન્સ અને વળતા પ્રહાર દરમિયાન બનેલી ફાયરિંગની ઘટનાઓમાં 2 આરોપીઓના મોત નીપજ્યા છે. આરોપીઓને ઘટનાસ્થળે જ અટકાવવા અને તેમની ભાગવાની યોજના નિષ્ફળ બનાવવા માટે પોલીસે આ આકરા પગલાં ભર્યા છે.