રાજ્યમાં નશાકારક પદાર્થો અને ગેરકાયદે દવાઓનું વેચાણ અટકાવવા માટે પોલીસ સતત સક્રિય છે. અમદાવાદ ગ્રામ્ય એન્ટી નાર્કોટિક્સ વિંગ દ્વારા બગોદરા વિસ્તારમાં મોટી કાર્યવાહી કરવામાં આવી છે. પોલીસને મળેલી ચોક્કસ બાતમીના આધારે બાવળા તાલુકાના કાણોતર ગામ ખાતે આવેલા એક રહેણાંક મકાનમાં ઓચિંતો દરોડો પાડવામાં આવ્યો હતો, જેનાથી નશાકારક સિરપનો વેપાર કરતા તત્વોમાં ફફડાટ ફેલાઈ ગયો છે.
અમૃત પ્રભુભાઈ રાઠોડના ઘરમાંથી મળી આવી 600 બોટલ
એન્ટી નાર્કોટિક્સ વિંગની ટીમ દ્વારા કાણોતર ગામે રહેતા અમૃત પ્રભુભાઈ રાઠોડના ઘરની સઘન તલાશી લેવામાં આવી હતી. તપાસ દરમિયાન ઘરમાંથી પ્રતિબંધિત કફ સિરપનો મોટો જથ્થો મળી આવ્યો હતો. પોલીસે ઘટના સ્થળેથી કુલ 600 જેટલી કફ સિરપની બોટલો કબ્જે કરી હતી. પ્રાથમિક તપાસમાં બહાર આવ્યું છે કે, આ આરોપી કફ સિરપનો જથ્થો ગેરકાયદે ઊંચા ભાવે વેચાણ કરવાના હેતુથી પોતાના ઘરે છુપાવીને રાખતો હતો.
FSL ની હાજરીમાં તપાસ, NDPS એક્ટ હેઠળ ગુનો નોંધાયો
દરોડાની આ કાર્યવાહી દરમિયાન FSLના અધિકારીઓને પણ સાથે રાખવામાં આવ્યા હતા. નિષ્ણાતોની હાજરીમાં તપાસ કરતા આ જપ્ત કરાયેલા કફ સિરપ NDPS એક્ટ (માદક દ્રવ્ય અને મનોઉત્તેજક પદાર્થ અધિનિયમ) હેઠળ પ્રતિબંધિત દાયરામાં આવતી હોવાનું સ્પષ્ટ થયું હતું. પોલીસે કફ સિરપની બોટલો તેમજ એક મોબાઇલ ફોન સહિત કુલ રૂ. 1,28,800 નો મુદ્દામાલ જપ્ત કર્યો છે.
આરોપી વિરુદ્ધ કાયદેસરની કડક કાર્યવાહી શરૂ
બગોદરા પોલીસ સ્ટેશનમાં પકડાયેલા આરોપી અમૃત પ્રભુભાઈ રાઠોડ વિરુદ્ધ NDPS એક્ટની ગંભીર કલમો હેઠળ ગુનો દાખલ કરવામાં આવ્યો છે. અમદાવાદ ગ્રામ્ય એન્ટી નાર્કોટિક્સ વિંગ દ્વારા આરોપીની ધરપકડ કરી લેવામાં આવી છે, અને આ નેટવર્ક સાથે અન્ય કોણ-કોણ સંકળાયેલું છે, તેમજ આ જથ્થો ક્યાંથી લાવવામાં આવ્યો હતો તે દિશામાં વધુ સઘન તપાસ હાથ ધરવામાં આવી છે.
આ પણ વાંચો: 28 October Top News: ગુજરાત સરકાર મોંઘવારી ભથ્થુ વધારશે? ઘટશે મુસાફરીનો સમય, આગામી ત્રણ દિવસ માવઠાની આગાહી
