અમદાવાદના સરખેજ-જુહાપુરા વિસ્તારમાં પર્દાફાશ થયેલા કરોડો રૂપિયાના MD ડ્રગ્સ ફેક્ટરી કેસમાં તપાસનું વ્યાપક ફલક હવે અન્ય રાજ્યો સુધી પહોંચ્યું છે. નાર્કોટિક્સ કંટ્રોલ બ્યુરો દ્વારા આંતરરાજ્ય ડ્રગ્સ રેકેટ સામે સકંજો કસીને વધુ બે મુખ્ય આરોપીઓને ઝડપી પાડવામાં મોટી સફળતા મેળવી છે. આ કેસની તપાસમાં ડ્રગ્સના નેટવર્કના કાળાં કારસ્તાનો રાજસ્થાન અને મધ્યપ્રદેશ સુધી ફેલાયેલા હોવાનું સ્પષ્ટ થયું છે.
પ્રતાપગઢના ગાઢ જંગલમાંથી અખ્તર અને જુનેદ ઝડપાયા
NCBની ટીમે ચોક્કસ બાતમી અને ટેકનિકલ સર્વેલન્સના આધારે રાજસ્થાનના પ્રતાપગઢ જિલ્લાના દુર્ગમ અને ગાઢ જંગલ વિસ્તારમાં મોડી રાત્રે એક સઘન કોમ્બિંગ ઓપરેશન હાથ ધર્યું હતું. જંગલના અંધકારમાં પોલીસથી બચવા છુપાઈને બેઠેલા અખ્તર અને જુનેદ નામના બે કુખ્યાત આરોપીઓને ટ્રેઇન્ડ સ્નિફર ડોગની મદદથી શોધી કાઢીને દબોચી લેવામાં આવ્યા હતા.
મધ્યપ્રદેશથી મંગાવાતું હતું રો-મટિરિયલ, પ્રતાપગઢમાં લીધી હતી ટ્રેનિંગ
અગાઉ આ કેસમાં પકડાયેલા આરોપી મુદ્દસર ખાને પૂછપરછ દરમિયાન એવા ખુલાસા કર્યા હતા કે, તેણે પ્રતાપગઢ ખાતે જ MD ડ્રગ્સ બનાવવાની સચોટ ટ્રેનિંગ લીધી હતી. આ ઉપરાંત, ડ્રગ્સના ઉત્પાદન માટે જરૂરી કાચો માલ (રો-મટિરિયલ) ખાસ કરીને મધ્યપ્રદેશમાંથી મંગાવવામાં આવતો હોવાની ચોંકાવનારી વિગતો પણ સામે આવી છે.
અન્ય ફરાર આરોપીઓની શોધખોળ માટે તપાસ તેજ
NCB દ્વારા પકડાયેલા બંને આરોપીઓની કડક પૂછપરછ હાથ ધરવામાં આવી છે, જેનાથી આંતરરાજ્ય ડ્રગ્સ નેટવર્કના અન્ય મોટા માફિયાઓ અને ગુપ્ત ભેદો બહાર આવવાની પૂરી સંભાવના છે. રાજસ્થાન અને મધ્યપ્રદેશમાં સંકળાયેલા આ નેટવર્કના અન્ય ફરાર આરોપીઓને ઝડપી પાડવા માટે NCBની ટીમોએ તપાસ વધુ તેજ બનાવી છે.
આ પણ વાંચો: Explainer: શું તમે આઈસક્રીમના ફ્રોઝન ડેઝર્ટ તો નથી ખાતાને! ખરીદતા પહેલા આ જાણી લો નહીંતર...!