અમદાવાદના આંબાવાડી વિસ્તારમાં આવેલી જાણીતી શેઠ સીએન વિદ્યાલયમાંથી એક અત્યંત શરમજનક ઘટના સામે આવી છે. શાળામાં અભ્યાસ કરતા ધોરણ-9ના એક વિદ્યાર્થીને શિક્ષક દ્વારા સામાન્ય બાબતમાં કોઈ અતિશય ગંભીર કારણ વગર સરેઆમ 6 જેટલા લાફા ઝીંકી દેવામાં આવ્યા હોવાની ઘટના પ્રકાશમાં આવી છે. આ અમાનવીય વર્તનને કારણે વાલીઓ અને શૈક્ષણિક જગતમાં ભારે રોષ ફેલાયો છે.
વર્ગખંડના CCTV ફૂટેજ સોશિયલ મીડિયા પર વાયરલ
આ સમગ્ર ઘટના ક્લાસરૂમની અંદર જ બની હતી, જેના સીસીટીવી ફૂટેજ સોશિયલ મીડિયા પર વાયરલ થઈ ગયા છે. વાયરલ થયેલા વીડિયોમાં સ્પષ્ટ જોઈ શકાય છે કે, શિક્ષક દ્વારા વિદ્યાર્થીને કેવી નિર્દયતાથી મારવામાં આવી રહ્યો છે. આ વીડિયો સામે આવ્યા બાદ વાલીઓમાં ભારે ચિંતા અને આક્રોશ જોવા મળી રહ્યો છે કે, શાળાઓમાં બાળકો કેટલા સુરક્ષિત છે.