અમદાવાદ શહેરની LCB ઝોન-7 પોલીસ ટીમે વાહનચોરીના ગુનાઓ ઉકેલવા માટે હાથ ધરેલા ખાસ અભિયાન દરમિયાન મોટી સફળતા મેળવી છે. અમદાવાદ શહેરમાં અને આસપાસના જિલ્લાઓમાં સક્રિય એવી આંતરજિલ્લા વાહનચોરી કરતી ગેંગનો પર્દાફાશ કરવામાં આવ્યો છે. પોલીસે ચોક્કસ બાતમી અને સઘન તપાસના આધારે વાહનચોરીમાં સંકળાયેલા 3 શાતિર આરોપીઓની ધરપકડ કરી લીધી છે.
મુખ્ય સૂત્રધાર બિપિન પરમાર સહિત 3 આરોપીઓ ગિરફ્તાર
ધરપકડ કરાયેલા આરોપીઓમાં ગેંગનો મુખ્ય સૂત્રધાર બિપિન પરમાર, અરકાન યાસીનભાઈ મલેક અને સાહિલખાન નિજામખાન મણિયારનો સમાવેશ થાય છે. પોલીસ તપાસમાં સામે આવ્યું છે કે, મુખ્ય આરોપી બિપિન પરમાર સામે અગાઉ પણ વાહનચોરીના આશરે 23 જેટલા ગંભીર ગુનાઓ નોંધાઈ ચૂક્યા છે. આ આરોપીઓ બાઈકની ચોરી કરવા માટે વિશેષ માસ્ટર ચાવીઓનો ઉપયોગ કરતા હતા.
રૂ. 6.50 લાખનો મસમોટો મુદ્દામાલ જપ્ત
પોલીસે આરોપીઓના કબજામાંથી ચોરીના કુલ 11 હીરો સ્પ્લેન્ડર પ્લસ બાઈક જપ્ત કર્યા છે, જેની અંદાજિત કિંમત રૂ. 6.45 લાખ થાય છે. આ ઉપરાંત ચોરી માટે ઉપયોગમાં લેવાતી બાઈકની 10 ડુપ્લિકેટ ચાવીઓ અને 1 મોબાઇલ ફોન પણ કબજે કરવામાં આવ્યો છે. આમ, પોલીસે કુલ રૂ. 6.50 લાખનો મુદ્દામાલ જપ્ત કરીને કાયદેસરની કાર્યવાહી કરી છે.
સરખેજ, બોપલ અને સુરેન્દ્રનગરના 10 ગુનાઓનો ભેદ ઉકેલાયો
આરોપીઓની કડક પૂછપરછ દરમિયાન અમદાવાદના સરખેજ, ચાંગોદર અને બોપલ સહિતના વિસ્તારોમાંથી થયેલી બાઈક ચોરીઓના ભેદ ઉકેલાયા છે. માત્ર અમદાવાદ જ નહીં, પરંતુ સુરેન્દ્રનગર અને તેની આસપાસના વિસ્તારોમાં નોંધાયેલા વાહનચોરીના ગુનાઓનો પણ પર્દાફાશ થયો છે. LCB ઝોન-7 એ આ કામગીરીથી કુલ 10 વાહનચોરીના ગુનાઓ ઉકેલી કાઢ્યા છે અને આ ગેંગ સાથે જોડાયેલા અન્ય તત્વોની શોધખોળ માટે વધુ તપાસ હાથ ધરી છે.
આ પણ વાંચો: Ahmedabad : BZ ગ્રુપ કૌભાંડ: ક્રિકેટરોના રોકાણ મામલે હાઇકોર્ટમાં અરજી, સરકાર અને CID ક્રાઇમને નોટિસ
