Dang: સાપુતારા પોલીસની સફળતા, અઢી વર્ષ જૂની હત્યાનો ભેદ ઉકેલાયો

ડાંગ જિલ્લાની પોલીસે એક મોટી સફળતા મેળવી છે. લગભગ અઢી વર્ષ પહેલા થયેલી ડાંગના દરાપાડા ગામની યુવતી ભાવિશા ભોયેની હત્યાનો ભેદ ઉકેલી નાખવામાં આવ્યો છે. આ કેસમાં પોલીસે સઘન તપાસ બાદ આરોપીને ઝડપી પાડીને ગુનાનો પર્દાફાશ કર્યો છે.

ડાંગ પોલીસે અઢી વર્ષ બાદ હત્યાનો ભેદ ઉકેલ્યો

ડાંગ પોલીસે કરેલી સઘન તપાસમાં સામે આવ્યું કે, દિનેશ દેશમુખ નામનો યુવક ભાવિશાનો પરિચિત હતો. દિનેશ ભાવિશાને પોતાની સ્કૂટી પર બેસાડીને વલસાડ જિલ્લાના વિલ્સન હિલ ખાતે લઈ ગયો હતો.ત્યાં કોઈ અજ્ઞાત કારણસર બંને વચ્ચે તકરાર (ઝઘડો) થઈ હતી. આ તકરાર ઉગ્ર બનતા આરોપી દિનેશે આવેશમાં આવીને દુપટ્ટા વડે ભાવિશાના ગળે ફાંસો આપી તેની હત્યા કરી નાખી હતી.

13 ફેબ્રુઆરી 2023ના રોજ થઇ હતી હત્યા

ભાવિશાની હત્યા અંગેની ફરિયાદ સાપુતારા પોલીસ સ્ટેશનમાં નોંધાઈ હતી. ડાંગ પોલીસે આ ગંભીર અને જૂના કેસની તપાસ હાથ ધરી હતી અને ટેકનિકલ તેમજ માનવીય સોર્સના આધારે અઢી વર્ષ જૂના આ હત્યાના ભેદને ઉકેલી નાખ્યો છે. પોલીસે આરોપી દિનેશ દેશમુખની ધરપકડ કરીને તેની વિરુદ્ધ કાયદેસરની કાર્યવાહી હાથ ધરી છે. લાંબા સમયથી વણઉકેલાયેલી આ હત્યાનો ભેદ ખૂલતાં મૃતકના પરિવારને ન્યાય મળવાની આશા બંધાઈ છે.