આણંદ જિલ્લાના આંકલાવ તાલુકાના નવાખલ ગામે ચકચાર મચાવનારા દુષ્કર્મ મામલે મોટી પરિણામલક્ષી કાર્યવાહી સામે આવી છે. ગંભીર ગુનાના આક્ષેપોમાં ઘેરાયેલા નવાખલ ગ્રામ પંચાયતના આરોપી સરપંચ દિલીપ સોલંકી સામે જિલ્લા વિકાસ અધિકારી (DDO) દેવાહુતી દ્વારા કડક વલણ અપનાવીને તેમને હોદ્દા પરથી સસ્પેન્ડ કરવાનો સત્તાવાર હુકમ કરવામાં આવ્યો છે. આ કડક કાર્યવાહી બાદ સ્થાનિક રાજકારણ અને પંચાયત આલમમાં ભારે ખળભળાટ મચી ગયો છે.
ડીડીઓ દેવાહુતીનો મોટો નિર્ણય, પંચાયત અધિનિયમ હેઠળ કાર્યવાહી
આણંદ જિલ્લા વિકાસ અધિકારી (DDO) દેવાહુતી દ્વારા ગુજરાત પંચાયત અધિનિયમની કલમ 57(1) હેઠળ મળેલી સત્તાનો ઉપયોગ કરીને આ નિર્ણય લેવામાં આવ્યો છે. ઉલ્લેખનીય છે કે આરોપી સરપંચ દિલીપ સોલંકી સામે આંકલાવ પોલીસ સ્ટેશનમાં દુષ્કર્મ અંગેનો ગંભીર ગુનો નોંધાયો હતો. આ ગુનાના આધારે તેમની અટકાયત કરવામાં આવી હતી અને હાલમાં તેઓ જેલમાં બંધ છે. ડીડીઓ દ્વારા બહાર પાડવામાં આવેલા હુકમમાં પણ સરપંચ હાલ જેલહવાલે હોવાનો સ્પષ્ટ ઉલ્લેખ કરવામાં આવ્યો છે.