રાજ્યમાં ભ્રષ્ટાચાર નાબૂદી માટે એન્ટી કરપ્શન બ્યુરો દ્વારા સતત સપાટો બોલાવવામાં આવી રહ્યો છે. આણંદ જિલ્લામાંથી એક મોટો ભ્રષ્ટાચારનો કિસ્સો પ્રકાશમાં આવ્યો છે, જ્યાં કાયદાના રક્ષક ગણાતા પોલીસ ઇન્સ્પેક્ટર પોતે જ લાંચ લેતા રંગે હાથ ઝડપાઈ ગયા છે. આ ઘટનાને પગલે આણંદ પોલીસ બેડામાં ભારે ખળભળાટ મચી ગયો છે.
હેરાન નહીં કરવાના બદલામાં માંગી હતી 40 હજારની લાંચ
મળતી વિગતો અનુસાર, આંકલાવ પોલીસ મથકમાં ફરજ બજાવતા પીઆઈ રાજદીપસિંહ વનારે એક નાગરિક પાસે કાયદાકીય કે અન્ય બાબતે હેરાન-પરેશાન નહીં કરવાના બદલામાં રૂ. 40,000 ની લાંચની માંગણી કરી હતી. અરજદાર લાંચ આપવા માંગતા ન હોવાથી તેમણે આ અંગે એન્ટી કરપ્શન બ્યુરો (ACB) નો સંપર્ક કરી સમગ્ર મામલે ફરિયાદ નોંધાવી હતી.
આણંદ એસીબી પીઆઈ આર. એન. વિરાણીએ ગોઠવી સફળ ટ્રેપ
ફરિયાદના આધારે આણંદ એસીબી પીઆઈ આર. એન. વિરાણી અને તેમની ટીમે આંકલાવ પોલીસ સ્ટેશન ખાતે જ લાંચનું આયોજનબદ્ધ છટકું ગોઠવ્યું હતું. આંકલાવ પોલીસ મથકમાં જ જ્યારે પીઆઈ રાજદીપસિંહ વનાર નક્કી થયા મુજબ રૂ. 40000 ની લાંચની રકમ સ્વીકારી રહ્યા હતા, ત્યારે એસીબીની ટીમે દરોડો પાડીને તેમને રંગે હાથે પકડી પાડ્યા હતા.
કાયદાકીય કાર્યવાહી અને આગળની તપાસ
એસીબીની ટીમે લાંચિયા પીઆઈ રાજદીપસિંહ વનારની અટકાયત કરી આગળની કાયદાકીય કાર્યવાહી હાથ ધરી છે. પોલીસ મથકમાં જ ઉચ્ચ અધિકારી લાંચ લેતા ઝડપાતા અન્ય કર્મચારીઓમાં પણ ફફડાટ વ્યાપી ગયો છે. એસીબી દ્વારા આરોપીના રહેણાંક સ્થાન તેમજ અન્ય મિલકતો અંગે પણ તપાસ લંબાવવામાં આવે તેવી શક્યતાઓ સેવાઈ રહી છે.
આ પણ વાંચો: Khambhat : 12 ગુનામાં વોન્ટેડ કુખ્યાત આરોપી આશીફ રૂપાલ હથિયાર સાથે આખરે ઝડપાયો
