ગુજરાતના સંસ્કારી નગરી ગણાતા ભાવનગર શહેરમાં કાયદો અને વ્યવસ્થાને ખુલ્લેઆમ પડકારતી એક અત્યંત શરમજનક અને ચોંકાવનારી ઘટના સામે આવી છે. શહેરના મફતનગર વિસ્તારમાં એન્ટી નાર્કોટિક્સ ટીમે બાતમીના આધારે ધડાકાભેર રેડ પાડીને નશાના સોદાગરોની ઊંઘ હરામ કરી દીધી છે. યુવાધનને પાયમાલ કરનાર આ ઝેરી કારોબારને ડામવા માટે પોલીસ સક્રિય બની છે અને અસામાજિક તત્વોના મનોબળ કચડી નાખવા માટે કડક કાર્યવાહી શરૂ કરી દીધી છે.
ઘરના કુંડા અને ફળિયામાં ફાલ્યો મોતનો છોડ
ચિત્રા ફિલ્ટરની ટાંકી પાસે આવેલા મફતનગર વિસ્તારમાં રહેતા મહેશ ઉર્ફે મયલો રાઠોડ નામના શખ્સે પોતાના જ રહેણાંક મકાનમાં ખાનગી રીતે ગાંજાનું ગેરકાયદેસર વાવેતર શરૂ કર્યું હતું. પોલીસની રેડ દરમિયાન આ નશાખોર શખ્સના મકાનના ફળિયા તેમજ ઘરના કુંડામાંથી કુલ 12 ગાંજાના છોડ મળી આવ્યા હતા. જેનું કુલ વજન 558 ગ્રામ અને અંદાજિત કિંમત રૂ. 27,900 આંકવામાં આવી છે. પોતાની સ્વાર્થ ખાતર યુવાનોના જીવન સાથે ચેડાં કરનાર આ નરાધમ શખ્સને એન્ટી નાર્કોટિક્સ ટીમે ત્વરિત દબોચી લીધો છે.