ભાવનગર જિલ્લાને હચમચાવી મુકનાર લઠ્ઠાકાંડ અને ગેરકાયદેસર દારૂના કારોબાર સામેની તપાસમાં પોલીસને મોટી સફળતા સાંપડી છે. સિહોર પોલીસે ડુપ્લિકેટ દારૂની સપ્લાયના ગુનામાં લાંબા સમયથી ફરાર ચાલી રહેલા આરોપી હરદીપસિંહ મોરીને ઝડપી પાડ્યો છે. પોલીસની પ્રાથમિક તપાસમાં સામે આવ્યું છે કે હરદીપસિંહ મોરીએ થોડા સમય પહેલાં જ સિહોર તાલુકાના સર ગામ અને ભાવનગરના કમળેજ ગામના સ્થાનિક બુટલેગરોને નામચીન 'રોયલ સ્ટેગ' બ્રાન્ડના નામે ડુપ્લિકેટ દારૂની પેટીઓ સપ્લાય કરી હતી.
મુખ્ય આરોપી ગૌતમ સોલંકી સાથે કનેક્શન ખુલતાં પોલીસ તપાસ તેજ
ઝડપાયેલા આરોપી હરદીપસિંહ મોરીની સઘન પૂછપરછ દરમિયાન આ કેસમાં વધુ એક ચોંકાવનારી બાબત સામે આવી છે. પકડાયેલા આરોપીનું કનેક્શન લઠ્ઠાકાંડના મુખ્ય આરોપી ગૌતમ સોલંકી સાથે હોવાનું પોલીસ તપાસમાં ખુલ્યું છે. ગૌતમ સોલંકી અને હરદીપસિંહ મળીને આ વિસ્તારમાં નકલી દારૂનું સપ્લાય નેટવર્ક ચલાવી રહ્યા હતા. આ ડુપ્લિકેટ દારૂ ક્યાં તૈયાર કરવામાં આવતો હતો અને તેમાં અન્ય કયા કયા બુટલેગરો કે સપ્લાયરો સંકળાયેલા છે તે દિશામાં પોલીસે તપાસનો ધમધમાટ શરૂ કર્યો છે.