સોશિયલ મીડિયા પર ફેમસ થવાની ઘેલછામાં યુવાનો કાયદો અને વ્યવસ્થાને કઈ રીતે ટાંચણે મૂકી રહ્યા છે તેનું તાજું ઉદાહરણ ભાવનગર જિલ્લાના પાલીતાણાથી સામે આવ્યું છે. પાલીતાણા શહેરમાંથી એક એવો વીડિયો વાયરલ થયો છે જેમાં એક યુવકે જાહેર રોડ વચ્ચે વચ્ચ ખુરશી મૂકીને ભારે ટ્રાફિકજામ કરી દીધો હતો. ટ્રાફિકના વચ્ચેના રસ્તે બેસીને ફિલ્મી ડાયલોગ કે ગીતો પર રીલ બનાવવાની આ ઘટનાથી સામાન્ય રાહદારીઓ અને વાહનચાલકોને ભારે હાલાકીનો સામનો કરવો પડ્યો હતો, જેને લઈને સ્થાનિક નાગરિકોમાં ભારે રોષ જોવા મળી રહ્યો છે.
ચાલુ કાર સામે ખુરશી ફેંકતો જોખમી સ્ટંટ કર્યો
વાયરલ થયેલા આ વિવાદાસ્પદ વીડિયોમાં યુવક પ્રખ્યાત મૂવીના 'ખલનાયક' ગીતની ધૂન પર જાહેરમાં બેફામ હરકતો કરતો નજરે પડે છે. એટલું જ નહીં, તેણે હદ તો ત્યારે કરી જ્યારે સામેથી આવી રહેલી એક ચાલુ કારની સામે અચાનક ખુરશી ફેંકીને જીવલેણ સ્ટંટ કરવાનો પ્રયાસ કર્યો હતો. આ પ્રકારના જોખમી સ્ટંટ્સ માત્ર ખુદના જીવન માટે જ નહીં પરંતુ રસ્તા પર પસાર થતા અન્ય નિર્દોષ નાગરિકોના જાનમાલ માટે પણ મોટું જોખમ ઊભું કરે છે. અગાઉ પણ આ જ યુવકના આવા અનેક રીલ્સ વાયરલ થઈ ચૂક્યા હોવાની ચર્ચાઓ જોરશોરથી ચાલી રહી છે.