ભાવનગર પંથકમાંથી એક અત્યંત ચોંકાવનારી અને ગંભીર ઘટના સામે આવી છે. ભાવનગર નજીક આવેલા વરતેજ વિસ્તારમાં જૂની અદાવતની અદાવત રાખીને એક યુવક પર ઘાતક હુમલો કરવામાં આવ્યો હોવાનો આક્ષેપ કરવામાં આવ્યો છે. પ્રાપ્ત માહિતી અનુસાર, ગઢડાથી ભાવનગર કોર્ટમાં કેસની મુદ્દત માટે આવી રહેલા એક પરિવારને નિશાન બનાવીને આ લોહિયાળ ખેલ ખેલવામાં આવ્યો હતો, જેના કારણે સમગ્ર પંથકમાં ચકચાર મચી ગઈ છે.
બાઈક અટકાવી પાઇપ અને તીક્ષ્ણ હથિયારોથી હુમલો
ઘટનાની વિગતો મુજબ, પીડિત પરિવાર જ્યારે બાઈક પર જઈ રહ્યો હતો ત્યારે રસ્તામાં 3 મુખ્ય શખ્સો સહિત કુલ 5 થી 6 અજાણ્યા શખ્સોએ તેમનું વાહન અટકાવ્યું હતું. ત્યારબાદ આરોપીઓએ લોખંડની પાઈપો અને તીક્ષ્ણ હથિયારો વડે પ્રતાપભાઈ નામના યુવક પર આડેધડ હુમલો કર્યો હતો, જેમાં તેમને માથાના ભાગે ગંભીર ઈજાઓ પહોંચી હતી. એટલું જ નહીં, હુમલા બાદ ઇજાગ્રસ્ત યુવકને રિક્ષામાં બેસાડીને અન્યત્ર લઈ જઈને રસ્તા પર ઢસડવામાં આવ્યા હોવાનો પણ પરિવારજનોએ ગંભીર આક્ષેપ કર્યો છે.

