દાહોદ જિલ્લાના ઉછવાણ ગામેથી પસાર થતી પાનમ નદીના પટમાં મોટા પાયે ચાલી રહેલા કથિત ગેરકાયદેસર રેતી ખનન સામે રાજ્યની સ્પેશિયલ ટાસ્ક ફોર્સ (STF) ની ટીમે લાલ આંખ કરી છે. STF ની ટીમે ગુપ્ત બાતમીના આધારે પાનમ નદીના પટમાં સરપ્રાઈઝ રેડ પાડીને બિનઅધિકૃત રીતે રેતીનું ઉત્ખનન કરી રહેલા નેટવર્કનો પર્દાફાશ કર્યો છે. આ કાર્યવાહીથી સમગ્ર વિસ્તારના રેતી માફિયાઓ અને ગેરકાયદેસર ખનન સાથે સંકળાયેલા તત્વોમાં ભારે ફફડાટ વ્યાપી ગયો છે.
કરોડોનો મુદ્દામાલ જપ્ત, મશીનો પંચાયતને સોંપાયા અને ડમ્પર પીપલોદ ખસેડાયા
દરોડા દરમિયાન STF ની ટીમે સ્થળ પરથી રેતી ખનનમાં ઉપયોગમાં લેવાતા 2 ભારે અતિઆધુનિક હિટાચી મશીન તેમજ રેતીની હેરાફેરી માટે વપરાતા 11 જેટલા હાઇવા ડમ્પરો જપ્ત કર્યા છે. પ્રાથમિક અંદાજ મુજબ જપ્ત કરવામાં આવેલા વાહનો અને મશીનરીની કિંમત કરોડો રૂપિયા આંકવામાં આવી રહી છે. સક્ષમ અધિકારીઓ દ્વારા 2 હિટાચી મશીનોને સ્થાનિક ગ્રામ પંચાયતની કસ્ટડીમાં સોંપવામાં આવ્યા છે, જ્યારે 11 હાઇવા ડમ્પરોને પીપલોદ ખાતે ખસેડીને કાયદેસરની સીઝીંગ કાર્યવાહી હાથ ધરવામાં આવી છે.