દાહોદની જાણીતી જી.પી. ધનકા શાળામાંથી શિક્ષણ જગતને શરમાવે તેવી એક ગંભીર ઘટના પ્રકાશમાં આવી છે. સોશિયલ મીડિયા પર એક વીડિયો ખૂબ જ વાયરલ થઈ રહ્યો છે, જેમાં શાળાના માસુમ વિદ્યાર્થીઓ પાસે અભ્યાસના સમયે સિમેન્ટના ભારે બ્લોક ઉંચકાવવામાં આવી રહ્યા છે. શૈક્ષણિક સંકુલમાં બાળકો પાસે આ પ્રકારે મજૂરી કરાવતો વીડિયો સામે આવતાં જ સમગ્ર જિલ્લાની શિક્ષણ વ્યવસ્થા અને શાળા તંત્રની લાલિયાવાડી સામે અનેક ગંભીર પ્રશ્નો ઊભા થયા છે.
બાળકોની સુરક્ષા સામે ચેડાં થતાં વાલીઓમાં ભારે આક્રોશ
શાળામાં બાળકો પોતાના ઉજ્જવળ ભવિષ્ય માટે ભણવા આવતા હોય છે, પરંતુ તેમના હાથમાં પુસ્તકોના બદલે સિમેન્ટના ભારે બ્લોક પકડાવી દેવાતાં વાલીઓમાં ભારે રોષ વ્યાપી ગયો છે. વિદ્યાર્થીઓની સુરક્ષા અને તેમના સ્વાસ્થ્ય સાથે સરેઆમ ચેડાં કરતી આ પ્રવૃત્તિ જોઈને સ્થાનિક પ્રજા અને વાલી મંડળોમાં ભારે આક્રોશ જોવા મળી રહ્યો છે. પ્રશાસન અને શાળા તંત્રની ઘોર બેદરકારીને કારણે માસુમ બાળકો જોખમમાં મુકાયા હોવાના ગંભીર આક્ષેપો થઈ રહ્યા છે.