ધોળકામાં કાયદો અને વ્યવસ્થાની સ્થિતિને પડકારતી એક સનસનાટીભરી હત્યાની ઘટના પ્રકાશમાં આવી છે. ધોળકાના દરબાર જીન વિસ્તારમાં આવેલી શ્રમિકોની એક ભાડાની ઓરડીમાં બિહારના પરપ્રાંતીય યુવકની તીક્ષ્ણ હથિયારના ઘા ઝીંકીને નિર્મમ હત્યા કરી દેવામાં આવી છે. આ લાઈવ હત્યાકાંડ બાદ સમગ્ર વિસ્તારના શ્રમિકો અને સ્થાનિક રહીશોમાં ભય ભરેલો ફફડાટ વ્યાપી ગયો છે.
ઓરડીમાં ઘૂસીને છરીના ઘા ઝીંક્યા
પોલીસના સત્તાવાર સૂત્રો પાસેથી મળતી પ્રાથમિક વિગતો અનુસાર, મૂળ બિહારનો વતની રાજલાલ હસડા નામનો યુવક ધોળકાના દરબાર જીન વિસ્તારમાં રૂમ ભાડે રાખીને રહેતો હતો અને સ્થાનિક સ્તરે મજૂરી કામ કરીને પોતાનું ગુજરાન ચલાવતો હતો. દરમિયાન, આજે કોઈ અગમ્ય કારણોસર એક અજાણ્યો શખ્સ તેની ઓરડીએ પહોંચ્યો હતો. બંને વચ્ચે કોઈ બાબતે ઉગ્ર બોલાચાલી કે ઝઘડો થયો હોવાનું અનુમાન છે. આ વિવાદ એટલો વણસ્યો કે અજાણ્યા હુમલાખોરે પોતાના ખિસ્સામાંથી છરી કાઢી રાજલાલ પર એકપછી એક એમ અનેક જીવલેણ ઘા ઝીંકી દીધા હતા. હુમલામાં ગંભીર રીતે ઘવાયેલો રાજલાલ લોહીલુહાણ હાલતમાં જમીન પર ઢળી પડ્યો હતો અને ઘટનાસ્થળે જ તેણે તડપી-તડપીને દમ તોડી દીધો હતો, જ્યારે આરોપી ગુનો આચરીને નાસી છૂટ્યો હતો.
