યાત્રાધામ ડાકોરમાં નવરાત્રી દરમિયાન મધરાત્રિના સમયે અચાનક પરિસ્થિતિ વણસતાં લોહિયાળ અથડામણ થઈ હતી.સત્યમ સોસાયટી નજીક નવી નગરી વિસ્તારમાં અચાનક બે કોમના જૂથો વચ્ચે ઉગ્ર બોલાચાલી બાદ ઘર્ષણ શરૂ થયું હતું.જોતજોતામાં મામલો એટલો ગંભીર બન્યો કે બંને જૂથના લોકો સામસામે આવી ગયા હતા અને ઉશ્કેરાટમાં તીક્ષ્ણ હથિયારો વડે એકબીજા પર હુમલા કરવા લાગ્યા હતા.મધરાતના સુમારે તીક્ષ્ણ હથિયારો સાથે થયેલી આ હિંસક મારામારીને કારણે સમગ્ર વિસ્તારમાં ભારે નાસભાગ અને ભયનો માહોલ ફેલાઈ ગયો હતો.તીક્ષ્ણ હથિયારોથી કરવામાં આવેલા આ હુમલામાં બંને તરફથી લોકો ઘવાયા હતા અને એક મહિલા સહિત કુલ 9 લોકો ગંભીર રીતે ઇજાગ્રસ્ત થયા હતા. 

આસપાસના લોકોમાં પણ ભારે ફફડાટ વ્યાપી ગયો

આ લોહિયાળ અથડામણના પગલે આસપાસના લોકોમાં પણ ભારે ફફડાટ વ્યાપી ગયો હતો. ઘટનાની જાણ થતાં જ સ્થાનિક લોકો એકઠા થઈ ગયા હતા અને ઇજાગ્રસ્તોને તાત્કાલિક સારવાર માટે ખસેડવા પ્રયાસો કર્યા હતાં.ડાકોર સબ ડિસ્ટ્રિક્ટ હોસ્પિટલમાં પ્રાથમિક સારવાર દરમિયાન ઇજાગ્રસ્તો પૈકી એક વ્યક્તિની તબિયત અત્યંત નાજુક હોવાનું જણાતાં તેને વધુ સઘન સારવાર અર્થે તાત્કાલિક નડીઆદ સિવિલ હોસ્પિટલ ખાતે રિફર કરવામાં આવ્યો હતો.આ ઉપરાંત અન્ય ચાર ઇજાગ્રસ્તોને પણ વધારે ગંભીર ઇજાઓ પહોંચી હોવાને કારણે વધુ સારવાર માટે તાકીદે નડીઆદ સિવિલ હોસ્પિટલ ખાતે ખસેડવામાં આવ્યા હતા.આમ કુલ પાંચ ઇજાગ્રસ્તોને વધુ સારવાર માટે નડીઆદ સિવિલ હોસ્પિટલમાં દાખલ કરવાની ફરજ પડી હતી.બાકીના ઇજાગ્રસ્તો ડાકોર સબ ડિસ્ટ્રિક્ટ હોસ્પિટલમાં સારવાર હેઠળ રખાયા છે. 

પોલીસ કાફલો ગણતરીની મિનિટોમાં જ પહોંચી ગયો

નવરાત્રીના તહેવાર ટાણે જ બનેલી આ લોહિયાળ ઘટનાના સમાચાર વાયુવેગે પ્રસરતાં સમગ્ર પંથકમાં ચકચાર મચી જવા પામી હતી.આ બનાવ અંગે ઉચ્ચ કક્ષાએ જાણ કરવામાં આવતાં વહીવટી અને પોલીસ તંત્રમાં દોડધામ મચી ગઈ હતી.ઘટનાની સંવેદનશીલતા જોતાં ડાકોર પોલીસ મથકના ઉચ્ચ અધિકારીઓ તેમજ ડીવાયએસપી સહિતનો પોલીસ કાફલો ગણતરીની મિનિટોમાં જ ઘટનાસ્થળે ધસી ગયો હતો.વહીવટી તંત્ર તરફથી ઠાસરાના મામલતદાર પણ સ્થિતિની સમીક્ષા કરવા માટે તાબડતોબ ઘટનાસ્થળે પહોંચ્યા હતા.તે ઉપરાંત ડાકોર નગરપાલિકાના સભ્યો પણ બનાવની ગંભીરતા જોઈ સ્થળ પર દોડી આવ્યા હતા.

પરિસ્થિતિ પર સતત ચાંપતી નજર 

અધિકારીઓએ ઘટનાસ્થળે પહોંચીને સમગ્ર પરિસ્થિતિનો તાગ મેળવ્યો હતો અને મામલો વધુ ન વણસે તે માટે તાત્કાલિક પગલાં લીધાં હતાં.સત્યમ સોસાયટી અને નવી નગરી વિસ્તારમાં બે કોમના જૂથો સામસામે આવી જવાની ઘટના બાદ વિસ્તારમાં ભારેલા અગ્નિ જેવી અતિ સંવેદનશીલ પરિસ્થિતિ નિર્માણ પામી હતી.કાયદો-વ્યવસ્થા જળવાઈ રહે તે સુનિશ્ચિત કરવા માટે સમગ્ર વિસ્તારમાં ચુસ્ત અને કડક પોલીસ બંદોબસ્ત ગોઠવી દેવામાં આવ્યો હતો.પોલીસ વિભાગ દ્વારા સંવેદનશીલ વિસ્તારોમાં પેટ્રોલિંગ સઘન બનાવી દેવામાં આવ્યું હતું જેથી કોઈપણ પ્રકારની અનિચ્છનીય ઘટના ફરીથી ન બને. ઉચ્ચ પોલીસ અધિકારીઓની સીધી દેખરેખ હેઠળ પરિસ્થિતિ પર સતત ચાંપતી નજર રાખવામાં આવી રહી છે. 

આ પણ વાંચોઃ Gujarat Latest News Live: ગુજરાતમાં ઉનાળા જેવી ગરમીના અહેસાસ વચ્ચે માવઠાની આગાહી