કચ્છ જિલ્લાના ભચાઉ શહેરમાં કાયદો અને વ્યવસ્થાની સ્થિતિ સામે ગંભીર સવાલો ઉભા કરતી એક ચોંકાવનારી ઘટના સામે આવી છે. ભચાઉ શહેરમાં અસામાજિક તત્વો અને તસ્કરોનો ત્રાસ દિવસે-દિવસે વધી રહ્યો છે, જેનું જીવંત ઉદાહરણ આજે નગરપાલિકા કચેરીની આસપાસ સ્થિત વિસ્તારમાં જોવા મળ્યું છે. અહીં Bank of Baroda (BoB) નું ATM મશીન તસ્કરો દ્વારા નિશાન બનાવવામાં આવ્યું હતું અને તેને તોડી નાખવામાં આવ્યું હતું. આ ઘટનાને કારણે સ્થાનિક વેપારીઓ અને નાગરિકોમાં ભારે ચકચાર તથા ભયનો માહોલ ફેલાઈ ગયો છે.
પોલીસની કામગીરી સામે ઉઠ્યા સવાલો
પ્રાપ્ત વિગતો મુજબ, તસ્કરો દ્વારા એટીએમ સેન્ટરમાં ઘૂસીને કેશ ડિપોઝિટ મશીન (CDM) અને એટીએમ મશીનને તોડવાનો ઘાતકી પ્રયાસ કરવામાં આવ્યો હતો. સદભાગ્યે, તસ્કરો રોકડ રકમ ચોરી જવામાં નિષ્ફળ રહ્યા હતા, પરંતુ તેમની આ તોડફોડના કારણે CDM મશીનને ભારે નુકસાન પહોંચ્યું છે. નગરપાલિકા જેવા જાહેર અને વરદી વાળા વિસ્તારમાં આ પ્રકારે એટીએમને તોડી નાખવાની ઘટના બનતા રાત્રિના સમયે પોલીસ પેટ્રોલિંગ અને નાકાબંધીની કામગીરી સામે લોકો દ્વારા અનેક ગંભીર સવાલો ઉઠાવવામાં આવી રહ્યા છે.