આજના સોશિયલ મીડિયાના યુગમાં લાઈક્સ, વ્યૂઝ અને ફોલોઅર્સ મેળવવાની દોડમાં યુવાનો કાયદાનું ભાન ભૂલીને જોખમી કારનામા કરતા હોય છે. તાજેતરમાં બનાસકાંઠા જિલ્લાના રાધનપુર વિસ્તારમાંથી એક એવો જ કિસ્સો સામે આવ્યો છે, જ્યાં એક યુવક દ્વારા પોલીસની અધિકૃત ગાડી સાથે રીલ બનાવીને સોશિયલ મીડિયા પર વાયરલ કરવામાં આવી હતી. આ વીડિયો વાયરલ થતાં જ પોલીસ વિભાગનું ધ્યાન આ બાબત પર ગયું હતું અને તંત્ર દ્વારા ત્વરિત પગલાં લેવાની કવાયત હાથ ધરવામાં આવી હતી.
પોલીસ સ્ટેશન બોલાવી યુવકને કરાવ્યું કાયદાનું ભાન
સોશિયલ મીડિયા પર સ્ટંટબાજી અને સરકારી વાહનના દુરુપયોગને ગંભીરતાથી લઈને રાધનપુર પોલીસ દ્વારા તરત જ તે યુવકને પોલીસ સ્ટેશન ખાતે બોલાવવામાં આવ્યો હતો. પોલીસ અધિકારીઓ દ્વારા યુવકને કાયદાની મર્યાદાઓ સમજાવવામાં આવી હતી અને સરકારી સંપત્તિ કે વાહનોનો આ પ્રકારે દુરુપયોગ કરવાના ગેરફાયદાથી વાકેફ કરાયા હતા. પોતાની ભૂલનું ગંભીર પરિણામ સમજાતા યુવકે પોલીસ સમક્ષ હાથ જોડીને માફી માંગી હતી અને ભવિષ્યમાં ક્યારેય પણ આ પ્રકારની હરકત નહીં કરવાની લેખિત કે મૌખિક ખાતરી આપી હતી.