રાજકોટ જિલ્લાના ભાયાવદર પંથકમાં પોલીસે એક મોટા કૌભાંડનો પર્દાફાશ કરીને સેક્સ પાવર વધારવાની દવાઓના ગેરકાયદેસર વેપાર કરતી એક આખી ગેંગને ઝડપી પાડી છે. આ ગેંગ માત્ર નકલી દવાઓ વેચતી નહોતી, પરંતુ ગ્રાહકોને બ્લેકમેલ પણ કરતી હતી. આ ગેંગના સભ્યો પાસે કોઈ માન્ય ડિગ્રી ન હોવા છતાં તેઓ પોતાને 'માન્યતા પ્રાપ્ત ડૉક્ટર' ગણાવીને ગેરકાયદેસર રીતે સેક્સ પાવર વધારતી દવાઓનું ઓનલાઈન વેચાણ કરતા હતા.
ઓનલાઇન કૌભાંડ અને બ્લેકમેલિંગની મોડસ ઓપરેન્ડી
આરોપીઓ ફેસબુક જેવા સોશિયલ મીડિયા પ્લેટફોર્મ પર આકર્ષક જાહેરાતો આપીને લોકોને ફસાવતા હતા. તેઓ છેલ્લા બે મહિનાથી સક્રિય હતા અને તેમની પાસેથી 4000 લોકોની ગ્રાહક યાદી મળી છે, જે દર્શાવે છે કે આ સમયગાળા દરમિયાન કેટલા મોટા પાયે આ દવાઓનું વેચાણ કરવામાં આવ્યું હતું. આ ગેંગની સૌથી ગંભીર ગુનાહિત પ્રવૃત્તિ એ હતી કે જે ગ્રાહકો દવાઓ ખરીદતા હતા, તેમને પછીથી ધમકીભર્યા ફોન કરીને ફરજિયાતપણે વધુ દવાઓ ખરીદવા માટે દબાણ કરવામાં આવતું હતું. ખરીદનારની અંગત માહિતીનો ઉપયોગ કરીને તેમનું બ્લેકમેલિંગ પણ કરવામાં આવતું હતું, જેના કારણે ઘણા ભોગ બનેલા લોકો ફરિયાદ કરતા ડરતા હતા.
