રાજકોટ જિલ્લામાંથી એક ચોંકાવનારી ઘટના સામે આવી છે, જ્યાં વિશ્વ હિન્દુ પરિષદના નામે ખોટો રોફ જમાવીને ફરજ પર રહેલા TRB જવાન સાથે દાદાગીરી કરવામાં આવી હતી. રાજકોટ-ગોંડલ હાઈવે પર આવેલા ઢોલરા ગામ પાસે રાજસ્થાન પાસિંગની એક સ્કોર્પિયો કારને રોકવામાં આવતા મામલો ઉગ્ર બન્યો હતો અને ગાડીમાં સવાર શખ્સોએ પોતાની ઓળખ VHPના મોટા માથા તરીકે આપીને હોબાળો મચાવ્યો હતો.
TRB જવાનને લાફા માર્યા અને વિડિયો વાયરલ
કાર રોકવા બાબતે ઉશ્કેરાયેલા શખ્સોએ ફરજ પર હાજર TRB જવાન પર પોતાનો રોફ જમાવ્યો હતો અને તેમને જાહેરમાં લાફાી દીધા હતા. આ સમગ્ર ગેરવર્તણૂક અને બબાલનો વીડિયો કોઈએ પોતાના મોબાઈલ કેમેરામાં કેદ કરી લીધો હતો, જે સોશિયલ મીડિયા પર જોતજોતામાં વાયરલ થઈ ગયો હતો. વિડિયો વાયરલ થતાં જ પોલીસ બેડામાં પણ દોડધામ મચી ગઈ હતી અને વહીવટી તંત્ર દ્વારા આ મામલે કડક પગલાં લેવામાં આવ્યા હતા.
