સુરત શહેરના ઉધના વિસ્તારમાં આવેલ હરીનગર-1 સ્થિત અરિહંત કોમ્પ્લેક્ષમાં બ્રાન્ડેડ કંપનીના નામે નકલી બૂટ-ચંપલ વેચાઈ રહ્યા હોવાની બાતમી મળતાં CID ક્રાઇમ સુરત ઝોને મોટી કાર્યવાહી હાથ ધરી હતી. પ્રખ્યાત 'PUMA' કંપનીના નામ અને લોગોનો ગેરકાયદેસર ઉપયોગ કરી બનાવટી માલ વેચવામાં આવતો હોવાની પ્રાપ્ત ફરિયાદના આધારે CID ક્રાઇમની ટીમે 16 સપ્ટેમ્બરે અરિહંત કોમ્પ્લેક્ષની 'શિવ ફૂટવેર', 'પ્રેમ ટ્રેડીંગ ફૂટવેર' અને 'સાગર ફૂટવેર' નામની ત્રણ દુકાનો પર સરપ્રાઈઝ રાઉન્ડ પાડી દરોડા પાડ્યા હતા.
3 વેપારીઓ સામે કોપીરાઇટ એક્ટ હેઠળ ગુનો
દરોડા દરમિયાન ત્રણેય દુકાનોમાંથી મોટા પ્રમાણમાં પ્યુમા (PUMA) બ્રાન્ડના ડુપ્લિકેટ બૂટ, ચંપલ અને સ્લીપરનો જથ્થો મળી આવ્યો હતો. CID ક્રાઇમે સ્થળ પરથી કુલ રૂ. 12.72 લાખની કિંમતનો બનાવટી માલસામાન જપ્ત કર્યો છે. આ કેસમાં કૉપીરાઇટ એક્ટ 1957ની કલમ 63 હેઠળ ગુનો નોંધીને ત્રણેય દુકાનદારો ગજાનંદ માંડવ, પ્રશાંત અગ્રવાલ અને સાવલારામ ચૌધરીની સ્થળ પરથી જ ધરપકડ કરી કાયદેસરની કાર્યવાહી હાથ ધરી છે.